TƏHLÜKƏSİZLİK

Məlumat verdiyimiz kimi, bu gün ölkənin əsas internet təchizatçısı Delta Telecom şirkətində yanğın olub.

Şirkətdən Xeberler.az-a verilən məlumata görə, yanğın texniki problemlərə səbəb olub və Azərbaycanın əksər istiafadəçilərinin uzun müddət  internət bağlantısı mümkün olmayıb. 

Delta Telecom şirkətindən Xeberler.az –a verilən məlumata görə, artıq yanğının nəticələri aradan qaldırılmaqdadır. Yanğının əsasən şirkətin müştəri avadanlıqları hissəsində baş verdiyi bildirilib. Qeyd olunub ki,  artıq yanğın nəticəsində ölkəyə daxil olan internet trafikində yaranan poblemlərin bir hissəsi bərpa olunub.

Xeberler.az –ın əldə etdiyi məlumata görə, yanğın yeraltı kabellərdə başlanıb və oradan da digər hissələrə, optik kabellərə keçib. Yanğının səbəbi isə hələlik bəlli deyil. Müəyyən ehtimalların olduğu bildirilib.

Belə ki, yanğın nəticəsində yaranan tüstü səbəbindən, həmçinin xüsusi avadanlıqlarda və kabellərdə, xüsusi serverlərdə baş verən yanğının tez bir zamanda söndürülməsi ilə bağlı müəyyən problemlərin olduğu bildirilir. Həmçinin də yanğınsöndürənlərin də hadisə yerinə bir qədər gec gəldikləri qeyd edilir.

Bu tip yanğınlarda sudan istifadə edilməsinin mümkün olmadığı məlumdur.

Xeberler.az yanğının nə üçün gec söndürüldüyünü, sistemin nə üçün bu qədər gec bərpa edildiyini  və hansı texnologiyalardan istifadə edilərək söndürüldüyünü hələlik dəqiqləşdirə bilməyib.

Bununla belə əsas hissədə yanğın söndürülərkən sudan istifadə edilmədiyi bildirilib.

Şirkətdən Xeberler.az –a o da bildirilib ki, milli internet resursların yerləşdiyi Data Mərkəzi yanğın baş verən ərazidən kənarda olduğundan hər hansı informasiya bazalarının və informasiya resurslarının sıradan çıxması halı baş verməyib.  

Ötən dəqiqələrdə artıq məlum olub ki, Delta Telecom-dan internet xidməti alan provayderlərin  müştəriləri internetə bağlana bilirlər.

Şirkətdən bildirilib ki, hazırda addım-addım fəsadların aradan qaldırılması davam edir.

Məlumatda o da bildirilib ki,  hazırda yanğının səbəblərini öyrənmək üçün Baş Prokurorluq, MTN və XDMX –nin xüsusi qrupları şirkətdə araşdırmalar aparır. Araşdırmalardan sonra baş verən hadisənin  səbəbləri haqqında ətraflı məlumat veriləcəyi bildirilib.

Delta Telecom-dan Xeberler.az –a  verilən məlumatda qeyd edilib ki, səhərədək artıq bütün ölkə ərazisində internet təminatı həll ediləcək.

Eyni zamanda Azərbaycan İnternet Forumunun prezidenti Osman Gündüz Xeberler.az- a bildirib ki,  uzun müddət ölkənin qlobal dünyadan ayrılması, informasiya münasibətlərinin  kəsilməsi ölkənin informasiya təhlükəsziliyi üçün ciddi təhdiddir.

O, baş verən hadisəni informasiya təhlükəsizliyi üçün ciddi təhlükə kimi dəyərləndirib.

Osman Gündüz ölkənin informasiya təhlüksəizliyi sisteminin daha dayanıqlı qurulması və informasiya fəzasının da alternativlər üzərində qurulmasının çox vacib olduğunu diqqətə çatdırıb.  

Forum prezidenti geniş miqyaslı  bir qəza nəticəsində şirkət tərəfindən internet bağlantısının təmin olunmasını da müsbət dəyərləndirib.

Bununla belə,  baş verən hadisənin ciddi olaraq araşdırılmasının, bunun təxribat və ya sabotaj olmasının müəyyən edilməsi istiqamətində təhqiqat aparılmasının, bununla bağlı  ictimaiyyətə yetərli məlumat verilməsinin vacibliyini də diqqətə çatdırıb.

 O, baş verən hadisə ilə bağlı  sabah AİF-in  açıqlaması olacağını da qeyd edib .

  Saat  23.00

Saat 23  radələrindən etibarən Delta Telecom –dan internet xidməti alan bəzi provayderlərin müştəriləri artıq internet bağlantısının mümkün olduğunu bildirib.

 Xeberler.az