İNNOVASİYA VƏ STARTAP

Azərbaycanlı təsisçilər tərəfindən qurulan və hazırda İstanbulda fəaliyyət göstərən startap Corpowid, Colin’s ilə strateji əməkdaşlığa başlayıb. Bu tərəfdaşlıq çərçivəsində Colin’s-in Azərbaycan üzrə rəsmi onlayn platformasının əlçatanlığı artırılaraq, fiziki məhdudiyyətləri olan istifadəçilər üçün daha rahat və inklüziv istifadə təcrübəsi yaradılacaq. 

Xeberler.az bildirir ki, layihə beynəlxalq səviyyədə qəbul olunmuş Veb Əlçatanlıq Təlimatları (WCAG) və Amerika Əlillər Aktı (ADA) kimi standartlara uyğun hazırlanır. Bu standartlar görmə, eşitmə və hərəkət məhdudiyyətli şəxslərin rəqəmsal məzmundan asanlıqla yararlana bilməsini təmin edir və onlayn platformaların hər kəs üçün əlçatan olmasını məqsəd qoyur.

Corpowid yalnız veb saytların əlçatanlığını təmin etməklə kifayətlənmir, eyni zamanda saytın sürət optimizasiyası, istifadəçi təcrübəsinin (UX) yaxşılaşdırılması və axtarış motorlarındakı (SEO) görünürlüyün artırılması kimi texniki dəstək xidmətləri də göstərir. 

Corpowid 2024-cü ildə fəaliyyətə başlamış və həmin ilin İstanbul Teknik Universiteti İTÜ Arı Teknokent tərəfindən təşkil olunan BigBang Startup Challenge yarışmasında 7,400-dən çox startap arasından seçilərək finala çıxmışdır. Bu yarışmada Corpowid ən çox dəstək alan 7-ci startap olaraq 2 milyon Türk lirəsindən artıq mükafat qazanmışdır. 2024-cü ildən etibarən Corpowid 5 ölkədə 100-dən çox müştəriyə xidmət göstərməkdədir. Startapın həmtəsisçiləri Elmir Həsənli və Aytən Məmmədovadır.

Corpowid-un həmtəsisçisi Elmir Həsənli qeyd edir:

“Biz inanırıq ki, texnologiya hər kəs üçün olmalıdır. Colin’s ilə birgə bu layihə vasitəsilə, rəqəmsal dünyada bərabərliyi və inklüzivliyi genişləndirməkdən qürur duyuruq.”

Colin’s üçün bu təşəbbüs, şirkətin sosial məsuliyyət strategiyasının mühüm hissəsidir və marka üçün yeni bir bazarda müsbət imic və istifadəçi məmnuniyyəti təmin edir.