STARTAP AZƏRBAYCAN

Məlum olduğu kimi, bir neçə ay əvvəl İnformasiya Texnologiyalarının İnkişafı Dövlət Fondunun keçirdiyi 2-ci qrant müsabiqəsində 129 İKT layihəsi iştirak edib. İlkin və kompleks ekspertizadan keçən 62 layihə Fondun Müşahidə Şurasına təqdim olunub.

Bu ilin yanvarında Müşahidə Şurası tərəfindən 30 layihənin qalib gəldiyi elan edilib və onların maliyyələşdirilməsi ilə bağlı qərar qəbul edilib. Lakin müsabiqədə qalib olan layihələr İT-in İnkişafı Dövlət Fondundan hələ də qrantlarını ala bilməyiblər.

Xəbərlər məsələ ilə bağlı araşdırma aparıb.

Məlum olub ki, mövcud qanunvericiliyinə görə qrant müqavilələri aidiyyatı dövlət qurumlarında qeydiyyatdan keçirilməlidir. Müqavilələr Fond tərəfindən aidiyyatı qurumlara təqdim edilməlidir. Qanunvericiliyə görə, şirkətlərin müqavilələri İqtisadi İnkişaf Nazirliyində, fiziki şəxslərin startap layihələrinin müqavilələri isə Ədliyyə Nazirliyində qeydiyyata alınmalıdır. Məlum olub ki, müsabiqədə qalib olmuş layihələrin müqavilələri artıq xeyli müddətdir ki, hazırlanıb və qeydiyyat üçün Ədliyyə və İqtisadi İnkişaf Nazirliyinə göndərilib.

Lakin müqavilələr hələ də qeydiyyata alınmayıb. Məsələyə münasibət bildirən Azərbaycan İnternet Forumunun rəhbəri, RYT Nazirliyi yanında İT-in İnkişafı Dövlət Fondunun Müşahidə Şurasının üzvü Osman Gündüz Xəbərlər-ə bildirib ki, dövlət tərəfindən verilən qrant müqavilələri qeydiyyata alınmaları üçün aidiyyatı dövlət qurumlarına göndərilməlidir.

Müşahidə Şurasının qərarı ilə qalib elan edilən startapların layihələri də artıq xeyli müddətdir ki, Fondun aparatı tərəfindən hazırlanıb, aidiyyatı qurumlara da göndərilib.

Onun sözlərinə görə, müqavilələrin qeydiyyatı ilə bağlı qanunvericiliyə uyğun olaraq müvafiq qaydalar hazırlanmalıdır. Hələlik bu qaydaların hazırlanmadığı bildirilir. O , bununla bağlı ləngimələr olduğunu diqqətə çatdırıb. Osman Gündüz xeyli müddət davam edən bu ləngimələrin əslində xoşagəlməz olduğunu da diqqətə çatdırıb:

“Müsabiqədə qalib olan şirkətlər, layihələr bu məsələdən narahatdırlar. Onlar artıq qalib olduqları üçün işlərini xeyli qabaqcadan planlayıblar. Axı onlar da xeyli sayda mütəxəssislərlə müavilələr bağlayıblar. Fond tərəfindən, Müşahidə Şurası tərəfindən aparılan işlərdə, qaydalarda bu qədər ləngimələr nəzərdə tutulmayıb. Odur ki, xeyli müddətdir ki, qaliblər işə başlamaq üçün vəsait gözləyirlər. Bu məsələnin gecikdirilməsi xoşagələn deyil. Ümid edirik ki, mövcud problem yaxın vaxtlarda həll olunacaq və vəsaitlər qaliblərə ödənilməyə başlanacaq”.

Məltəm Talıbzadə