Ötən həftə Azərbaycan Dəmir Yollarında (ADY) rəqəmsal transformasiya məsələləri ilə yaxından tanışlıq məqsədilə görüş təşkil edilib
Xeberler.az məlumat verir ki, görüşdə ADY rəsmiləri və ekspertlər iştirak edib.
Qeyd edək ki, Azərbaycan Dəmir Yolları infrastrukturun rəqəmsallaşması üçün Asiya İnkişaf Bankından (AİF) 47 milyon dollar
kredit alıb.
Görüşdə Azərbaycan Dəmir Yollarının Rəqəmsal inkişaf departamentinin rəhbəri Andrey İskriç tansformasiya layihəsinin təqdimatını edib.
Layihə İT infrastrukturun və təhlükəsizlik sisteminin qurulmasını, nəqliyyat dəhlizləri üzrə əməliyyatların, bütün daxili proseslərin və idarəetmənin səmərəliliyinin artırılması üçün rəqəmsallaşmanı nəzərdə tutur. Qonşu ölkələrlə inteqarsiyalar, real vaxtda sənəd dövriyyəsinin işlənilməsi, sənədləşmə və maliyyə proseslərinin tam rəqəmsallaşması nəzərdə tutulur.
Daha çox yükdaşımanın rəqəmsal transformasiyasına diqqət yetirilsə də, sərnişindaşımanın da rəqəmsallaşması istiqamətində artıq işlərə başlandığı, biletlərin müxtəlif seçimlərlə alışı, geri qaytarılması, hərəkət cədvəlilə tanışlıq və ödənişlərlə bağlı rəqəmsal və mobil həllərin yaradıldığı, yeni və daha rahat, biometrik texnologiyalara əsaslanan ödəniş sistemləri üzərində iş aparıldığı bildirilib.
Ölkədaxili dəmir yol infrastrukturu boyunca çəkilən fiberoptik xətlərdən effektiv istifadə ediləcəyi vurğulanıb. Bölgələrdəki dəmir yol stansiyalarının da rəqəmsallaşdırılmasına başlanıb.
Görüşdə ADY-də adı çəkilən layihənin icrasında şəffaflıq və maraqlı tərəflərin iştirakı, keyfiyyət və müqavilələrə nəzarət məsələlərinə də toxunulub. Bu məsələlərə xüsusi nəzarət ediləcəyi, şəffaflığın təmin ediləcəyi bildirilib, müqavilələrə nəzarət üçün rəqəmsal sistemlərin yaradılacağı bildirilib.
Məsələyə Azərbaycan İnterenet Formunun Prezidenti, ekspert Osman Gündüz münasibət bildirib.
Osman Gündüzün sözlərinə görə, baxmayaraq ki, mövzu rəqəmsallaşmadır, ADY-nın “zəif bənd”inə, 4 ildən çoxdur dayanan daxili dəmir yol marşrutlarının nə zaman işə düşəcəyi məsələsinə də diqqət yetirilib:
"Bir neçə daxili dəmir yol marşrutları üzrə yenidənqurma işlərinə, infrastrukturun bərpasına başlanıldığı və işlərin davam etdirildiyi, daxili resursların cəlb edildiyi qeyd olunub".
Ekspert bildirib ki, Bakı – Balakən və digər dəmir yol xəttlərinin bərpası və yaxın zamanlarda istifadəyə verilməsi istiqamətində işlərin davam etdirildiği vurğulanıb:
"Rəqəmsal transformasiya və beynəlxalq platformalara inteqrasiya ilə Azərbaycan regionda daha modern və cəlbedici bir nəqliyyat mərkəzinə çevriləcək".
Osman Gündüz qeyd edib ki, Azərbaycanda indiyədək böyük maliyyə tutumu olan İT layihələr çox olub. Bu layihələrin bir çoxunun icrasınada şəffaflıq və hesabatlılıq, ictimai və dövlət nəzarəti yetərli olmayıb. Odur ki, onların bir çoxu iflasa uğrayıb və qarşıya qoyulan vəzifələri sadəcə yerinə yetirə bilməyiblər.
Ekspertin sözlərinə görə, ADY-da rəqəmsallaşma istiqamətində son iki ildə atılan addımlar, layihə çərçivəsində aparılan işlər, mediaya açıqlamalar, maraqlı tərəflərə müraciətlər, ekpertlərlə görüşlərin təşkili, hesabatlılıq və şəffaflıqla bağlı açıqlamalar hələlik bu layihənin uğurlu olacağını düşünmək üçün əsas verir.
