Rəqəmsal torpaq xəritələri varmı, Milli Məkan Məlumatları infrastrukturu quruldumu ?
"Elektron hökumətin əsas tərkib hissələrindən biri də Milli Məkan Məlumatları infrastrukturudur. Prezidentin 28 dekabr 2018-ci il tarixli Fərmanı ilə “Milli məkan məlumatlarının formalaşdırılması və inteqrasiyası Qaydaları” təsdiq edilib.
Fərmana uyğun olaraq Əmlak Məsələləri Dövlət Komitəsi Milli Məkan Məlumatları İnformasiya Sistemini yaratmalı və Elektron Hökumət İnformasiya Sisteminə inteqrasiya etməliydi.
İşlərin görülməsi üçün açıq tender keçirilib və İsrailin beynəlxalq “Ofek Aerial Photography” şirkəti tenderin qalibi elan edilib. Milli Məkan Məlumatları İnformasiya Sisteminin 2019-cu ilin sonuna hazır olacağı bildirilirdi. Bu işlərin görülməsi VXSİ Dövlət Agentliyi və Əmlak Məsələləri Dövlət Xidmətinə (sistemin operatoru) həvalə olunmuşdu. Hələlik adı çəkilən sistem ortada yoxdur.
Prezidentin adı çəkilən fərmanının bir çox bəndləri də hələlik icra edilməyib.
Milli Məkan Məlumatları sistemində torpaqların elektron kadastrı və rəqəmsal xəritələr mühüm yer tutur. Bu istiqmaətdə də nəzərdə tutulan işlər başa çatdırılmayıb.
Torpaqların Elektron Kadastr Sisteminin yaradılması və rəqəmsal kadastr xəritələrinin tərtibi ilə bağlı 5 il bundan öncə, 7 mart 2016-cı ildə Prezident fərman imzalayıb. İşlərin görülməsi indiki Əmlak Məsələləri Dövlət Xidmətinə tapşırılmışdı.
Bununla bağlı 2016 - 2020-ci illəri əhatə edəb Dövlət Proqramı olub. Elektron kadastr (torpaqların dəqiq sərhədləri, mülkiyyət mənsubiyyəti, kateqoriyası, münbitlik dərəcəsi, şorlaşma vəziyyəti, mühafizə zonaları və s.) və rəqəmsal xəritələr 56 bölgəni əhatə etməliydi.
Xatırlayıram ki, ötən illərdə, xüsusən də 2016-2018 –ci illərdə bu işlərin reallaşması istiqamətində bir xeyli uğurlu addımlar atılmışdı. 2018-ci ilin sonlarında artıq 42 bölgə üzrə işlərin yekunlaşdığı bildirilridi. Rəsmi açıqlamalara görə 2019-cu ildə işlərin başa çatdırılması və Sistemin onlayn rejimdə işə salınması gözlənilirdi. Amma hələlik ortada belə bir resurs yoxdur.
Düşünrəm ki, hazırda nəinki qabaqcadan müəyyən olunan 56 bölgədə, hazırda işğaldan azad olunan torpaqlarımızda da belə bir elektron kadastrın və rəqəmsal xəritələrin hazırlanması mühüm əhəmiyyət kəsb edir.
Odur ki, Əmlak Məsələləri Dövlət Xidməti və VXSİ Dövlət Agentliyi Milli Məkan Məlumatları infrastrukturunun qurulması istiqamətində işləri canlandırmalıdırlar. Milli Məkan Məlumatları sistemində xüsusi yer tutan, böyük əmək sərf olunaraq hazırlanan faydalı bir dövlət resursu, Ünvan Portalı (unvanportali.az) resursu da təəssüf ki aktiv deyil".
Azərbaycan İnternet Formunun Prezidenti Osman Gündüz
