"Azərbaycanda dövlətə məxsus ən nəhəng informasiya resursunun hazırlanması işləri xeyli sürətlənib".
Xeberler.az bildirir ki, bunu Azərbaycan İnternet Formunun Prezidenti, ekspert Osman Gündüz deyib.
Ekspertin sözlərinə görə, 10 il bundan öncə icrasına tapşırıq verilən "Milli Məkan Məlumatları" ilə bağlı işlər nəhayət ki xeyli canlanıb:
"İqtisadiyyat Nazirliyinin təşkilatçılığı ilə İşçi Qrupunun növbəti iclası keçirilib. Dövlət qurumlarında mövcud olan məkan məlumatlarının vahid sistemə – “Milli Məkan Məlumatları” informasiya sisteminə inteqrasiyası prosesi haqqında fikir mübadiləsi aparılıb.
Xatırladıram ki, “Milli Məkan Məlumatları” informasiya sistemi dedikdə çoxsaylı ictimai məlumatların (topoqrafik, geoloji, ekoloji, şəhər yolları, su şəbəkələri, elektrik xətləri, su hövzələri, meşə sahələri və ya çirklənmiş bölgələr, şəhərsalma planları, fərdi torpaq mülkiyyətlərinin qeydiyyatı və kadastr məlumatları və s.) inteqrasiya olunduğu bir rəqəmsal resurs nəzərdə tutulur.
Ümumiyyətlə, son zamanlar hiss olunur ki, İqtisadiyyat Nazirliyi bu infrastrukturun əsas operatoru müəyyən olunandan sonra bu proses xeyli sürətlənib.
Xatırladıram ki, ötən ilin sonu bununla bağlı İqtisadiyyat Nazirliyinin tenderləri olub.
İki tender üzrə bu işlərin görülməsinə 25 milyon manatdan çox vəsait ayrılıb.
CASPEL şirkəti, Cyberpoint və RİSK şirkətləri ilə birləşərək bu tenderi udub".
Ekspert bildirib ki, bir müddət öncə İqtisadiyyat Nazirliyinin ABŞ qurumu “Environmental Systems Research Institute” ilə Milli Məkan Məlumatları sahəsində bilik mübadiləsi, bu sahədə insan resurslarının inkişafı və özəl sektorda coğrafi informasiya sistemlərinin hazırlanması üzrə Anlaşma Memorandumu imzalayıb:
"Bu layihənin əsas aparıcı təşkilatçılarından olan İqtisadiyyat Nazirliyi yanında Əmlak Məsələləri Dövlət Xidməti də ötən ay Xorvatiyada bu sahədə təcrübənin öyrənilməsi üçün nümayəndə heyəti göndərmişdi.
Keçən ay Prezident fərmanı ilə “Milli Məkan Məlumatları” informasiya sistemi “Elektron hökumət” portalına qoşulmalı olan informasiya sistemlərinin və ehtiyatlarının Siyahısı”na daxil edilib.
Xatırladıram ki, əvvəllər bir çox dövlət qurumlarının iddialı olduğu bu layihə sonda İqtisadiyyat Nazirliyinə həvalə edilib.
İqtisadiyyat Nazirliyi isə cari il aidiyyəti qurumların iştirakı ilə İşçi Qrup formalaşdırıb".
Osman Gündüz bildirib ki, hələlik qrupa vətəndaş cəmiyyətindən, müstəqil ekspertlərdən və biznesdən nümayəndələr daxil edilməyib.
Hansı ki, belə bir kritik informasiya resursu üçün, ictimai əhəmiyyətli bir layihə üçün bu olduqca vacibdir.
Ümid edirəm yekunda İqtisadiyyat Nazirliyi, CASPEL şirkəti, Cyberpoint və RİSK şirkətləri dövlət və biznes üçün, bütövlükdə cəmiyyət üçün əlçatan olan, faydalı bir informasiya resursu ortaya çıxara biləcəklər".
