"Bir müddət öncə İqtisadiyyat Nazirliyinin elan etdiyi “Milli Məkan Məlumatları İnformasiya Sisteminin yaradılması” ilə bağlı 21 milyonluq tender haqqında məlumat vermişdim".
Xeberler.az məlumat verir ki, bu sözləri Azərbaycan İnternet Formunun prezidenti, ekspert Osman Gündüz deyib.
Ekspert bildirib ki, 250 səhifəlik texniki şərtlər toplusundan görsənirdi ki, layihə ölkə miqyasında bütün mövcud coğrafi məlumatların toplanması, saxlanması, emal edilməsi və istifadəsi üçün nəzərdə tutulan bir informasiya sistemini yaratmağı hədəfləyib:
"Layihədə çoxsaylı məlumatların (topoqrafik, geoloji, ekoloji, şəhər yolları, su şəbəkələri, elektrik xətləri, su hövzələri, meşə sahələri və ya çirklənmiş bölgələr, şəhərsalma planları, fərdi torpaq mülkiyyətlərinin qeydiyyatı və kadastr məlumatları və s.) inteqrasiya olunduğu rəqəmsal resursun yaradılması nəzərdə tutulur. Tenderə Azərbaycanın ən böyük İT şirkətləri, Best Comp, CASPEL, SİNAM, ULTRA şirkətləri qatılmışdı".
Osman Gündüzün sözlərinə görə, tenderlə bağlı müddət bir neçə dəfə uzadılsa da, uzun müzakirələrdən sonra artıq məlumat verilib ki, CASPEL şirkəti, Cyberpoint və RİSK şirkətləri ilə birləşərək bu tenderi udub və adı çəkilən informasiya resursunun hazırlanması ilə bağlı 19 milyonluq bir müqavilə imzalanıb:
"Görünür ki, ölkənin ən böyük İT şirkəti olan CASPEL üçün də təklikdə bu tenderdə qalib gəlmək çətin olub.
Xatırladıram ki, uzun illər bu layihəni reallaşdırmaq mümkün olmayıb. Prosesə az qala 10 il bundan öncə başlanıb və ən geci 2019-cu ilə hazır olmalıydı.
Əvvəllər bu sahə ilə Dövlət Torpaq Komitəsi, sonradan Əmlak Məsələləri Dövlət Xidməti, ASAN, RİNN, sonradan İqtisadiyyat Nazirliyi müxtəlif formalarda məşğul olub".
Ekspert qeyd edib ki, illər öncə hətta İsrailin “Ofek Aerial Photography” şirkəti ilə müqavilələr də bağlanmışdı. Amma nədənsə sonralar bu reallşmadı:
"Görünür ki, hökumət bu cür strateji bir layihəni yerli şirkətlərə verməyi üstün tutub, hansı ki, hesab edirəm bu, çox doğru bir yanaşmadır.
Bildiyim qədər artıq CASPEL partnyor şirkətlərlə birgə Milli Məkan Məlumatları infrastrukturunun qurulmasına və informasiya sisteminin hazırlanmasına start verib.
Ümid edirəm CASPEL və digər partnyorlar maraqlı tərəfləri də bu nəhəng layihənin icrasına cəlb edəcəklər".
Osman Gündüz düşünür ki, İqtisadiyyat Nazirliyinin yetərincə ictimai əhəmiyyət kəsb edəb bu layihənin icrasına ictimai nəzarət imkanlarını yaratması da çox vacibdir:
"Tenderdə konsorsium formasında qalib olan hər bir şirkətin sektordakı təcrübəsini nəzərə alaraq ümid edirəm ki hamı üçün əlçatan olan, ən yüksək texnologiyalar əsasında qurulan bir faydalı informasiya resursu ortaya çıxara biləcəklər.
Fikrimcə bu resursun rəqəmsal hökumət infrastrukturuna inteqrasiyası ilə yanaşı, hazırda qurulması nəzərdə tutulan Superkompüter Mərkəzinə də inteqrasiya etmək doğru olardı".
Sonda ekspert bildirib ki, kritik resursların siyahıları açıqlanmasa da düşünmək olar ki, bu cür strateji və ciddi bir informasiya resursu da dərhal kritik informasiya infrastrukturuna və DTX və XRİTDX-nin nəzarət perimetrinə daxil edilib:
"Düşünürəm ki, dövlət və özəl sektor üçün, həmçinin elm sektoru və vətəndaşlar üçün nəzərdə tutulan bu nəhəng ictimai resurs ölkənin rəqəmsal transformasiyası üçün, daha doğru və effektiv qərarların qəbulu üçün mühüm əhəmiyyət kəsb edir".
