TƏHLİL VƏ RƏYLƏR

"Düşünürəm ki, indiki anda "Twitter" sosial media resursuna Azərbaycan ərazisindən qoyulan məhdudiyyətin arada qaldırılması çox faydalı ola bilərdi"

Xeberler.az bildirir ki, bunu ölkədə hazırda internetin məhdudlaşdırılmasına münasibət bildirən Azərbaycan İnternet Forumunun prezidenti Osman Gündüz hökumətə sosial şəbəkələrdə çağırış edərək deyib: 

"İndiki anda bu platforma Azərbaycan həqiqətlərini dünyaya çatdırmaq üçün hədsiz dərəcədə vacibdir.

Eyni zamanda Prezidentin və digər dövlət rəsmilərinin son zamanlar vətəndaşlarla informasiya münasibətlərinin həm də bu platformadan qurması, Birinci-vitse prezident Mehriban Əliyevanın bütün sosial media platformalarından effektiv istifadə ilə bağlı çağırışı beynəlxalq ictimai rəyə ciddi təsir imkanı olan Twitterin ölkədə əlçatan olmasını zəruri edir.

Fikrimcə, "Twitter"in Azərbaycandilli audityoriyası ciddi bir təbəqədir, intellektualdır, əsasən ictimai fəallar, rəsmilər və informasiya ictimaiyyətinin nümayəndələridir, şayiə və panikaya uyan deyil. Əksinə, Twitter istifadəçilərimiz xarici dillərdə faydalı kontent yaratmaqla beynəlxalq ictimai rəyin formalaşmasında ciddi rol oynayır.

Əvvəlki hərbi əməliyyatlar zamanı və Azərbaycanda keçirilən beynəlxalq tədbirlər zamanı da "Twitter" anti-Azərbaycan təbliğatının qarşısının alınmasında müstəsna rol oynamışdı.

Bütün bunları nəzərə alaraq , düşünürəm ki, "Twitter" ə tətbiq edilən məhdudiyyətin aradan qaldırılması informasiya sahəsində milli maraqlarımızın qorunması baxımından faydalı olardı".