E - HÖKUMƏT

AMEA İnformasiya Texnologiyaları İnstitutunun şöbə müdiri Təhmasib Fətəliyev Respublika Elmi Tədqiqatların Əlaqələndirilməsi Şurası üçün “Elmi problemlər reyestri” informasiya sisteminin və Elmi problemlər üzrə elmi şuraların veb-saytlarının yaradılmasından danışıb.

İnstitutdan Xeberler.az-a verilən məlumata görə, Təhmasib Fətəliyev bildirib ki,  məqsəd Respublika Elmi Tədqiqatların Əlaqələndirilməsi Şurası və Elmi problemlər üzrə elmi şuraların fəaliyyətinin informasiya texnologiyalarının tətbiqi ilə müasir informasiya cəmiyyətinin tələblərinə uyğun inkişaf etdirilməsi və yaradılan informasiya resurslarında müntəzəm olaraq öz əksini tapan məlumatların analizi ilə elmin idarə olunmasına dəstək verilməsidir.

Onun sözlərinə görə, “Elmi problemlər reyestri” informasiya sisteminin yaradılması üçün ölkə üzrə elmi problemlərin mövcud vəziyyətinin monitorinqinin aparılması nəzərdə tutulur. Eyni zamanda, Respublika Elmi Tədqiqatların Əlaqələndirilməsi Şurası və Elmi problemlər üzrə elmi şuraların veb-saytlarının yaradılması istiqamətində müvafiq işlər görülür.

T.Fətəliyev “Elmi problemlər reyestri” informasiya sisteminin yaradılması ilə respublikada fəaliyyət göstərən elmi qurumlarda tədqiq olunan elmi problemlərin pasportlaşdırılaraq vahid reyestrdə saxlanacağını və onların emalı prosesindən əldə olunan nəticələrin elmi-tədqiqatlarda təkrarçılığın aşkarlanmasında, aparılan araşdırmaların effektivliyinin artırılmasında, ayrı-ayrı tədqiqatçı və elmi qurumların fəaliyyətlərinin qiymətləndirilməsində və idarəetmə qərarlarının qəbulunda mühüm rol oynayacağını qeyd edib.

 AMEA-nın akademik-katibi, institutun direktoru, akademik Rasim Əliquliyev  Azərbaycan Respublikası Prezidentinin “Azərbaycan Milli Elmlər Akademiyasının statusu haqqında” fərmanına uyğun olaraq AMEA Rəyasət Heyətinin qərarı ilə yaradılmış və AMEA-nın nəzdində fəaliyyət göstərən Respublika Elmi Tədqiqatların Əlaqələndirilməsi Şurasının respublikada elmin koordinatoru kimi bütün elmi-tədqiqat və ali təhsil müəssisələrində müxtəlif elm sahələri üzrə aparılan fundamental və tətbiqi tədqiqatların əlaqələndirilməsinə və həyata keçirilməsinə nəzarət edən səlahiyyətli orqan olmasını qeyd edib.

Bu baxımdan AMEA-da elektron elm çərçivəsində aparılan islahatlara uyğun olaraq onun fəaliyyətinə dəstək kimi ölkə üzrə elmi problemlərin vahid reyestrinin yaradılmasının zəruriliyini vurğulayıb.

Xeberler.az