AZNET

Mərkəzi Elmi Kitabxana (MEK) öz kitab fondlarında saxlanılan kolleksiyalar barədə ictimaiyyəti məlumatlandırma fəaliyyətinə başlayıb.

Kitabxanadan Xeberler.az-a verilən məlumata görə, təşkil olunan dəyirmi masada görkəmli türkoloq, Macarıstan Elmlər Akademiyasının həqiqi üzvü Georq Hazainin kitabxananın Şərq Ədəbiyyatı Fondunda saxlanılan şəxsi kolleksiyasının təqdimatı barədə fikir mübadiləsi aparılıb.

Dəyirmi masada çıxış edən MEK-in direktoru, tibb üzrə fəlsəfə dokroru Leyla İmanova kitabxananın fondlarında çoxsaylı şəxsi kolleksiyaların saxlanıldığını bildirib. MEK rəhbəri bu kolleksiyaların təqdimatına dair silsilə tədbirlərin keçiriləcəyini, həmçinin kataloqlaşdırma layihələri çərçivəsində bu kolleksiyaların elektron kataloqlaşdırlmasının aparılacağını da qeyd edib.

Sonra çıxış edən MEK-in Şərq Ədəbiyyatı Fondunun rəhbəri Aidə Hüseynova  fondda uzun illərdir beynəlxalq mübadilə, hədiyyə yolu ilə toplanan və mühafizə edilən minlərlə qiymətli ədəbiyyat, eyni zamanda dünya şöhrətli şərqşünas alimlərin şəxsi kolleksiyaları haqqında məlumat verib. A.Hüseynova bildirib ki, hələ illər öncə akademik G.Hazai şəxsi kitabxanasının türkologiyaya aid bölməsini AMEA-nın kitabxanasına bağışlamaq niyyətində olduğu barədə ölkəmizin Macarıstandakı səfirliyinə müraciət edib.

Daha  sonra dəyirmi masada alimin kolleksiyasının tədqiqi və kataloqlaşdırılması işində əməyi olan əməkdaşlar çıxış ediblər. Bütün ömrünü və elmi fəaliyyətini türk dünyasının öyrənilməsinə həsr edən qərbli, macar əsilli alimin Şərq dünyasına son dərəcə vurğunluğundan söz açıblar.

Sonda dəyirmi masada bir sıra təkliflər səsləndirilib. G.Hazainin Qarabağ konfilikti ilə bağlı məqalə və çıxışlarının MEK-in “Qarabağ” guşəsində yerləşdirilməsi, bu materilların rəqəmsallaşdırılaraq “Vahid Qeydiyyat Sistemi”nə daxil edilməsi, həmçinin Birinci Türkoloji Qurultayın 90 illik yubileyinə töhvə olaraq akademik G.Hazinin kolleksiyasının virtual sərgisinin təşkil edilməsi və digər məsələlər nəzərdə tutulub.

Günel