TƏDBİRLƏR

İnformasiya Texnologiyaları İnstitutunda Elm və Təhsil Nazirliyi tərəfindən maliyyələşdirilən “Kibersuveren dövlətin formalaşdırılması və onun informasiya təhlükəsizliyinin təmin olunması üçün intellektual metod və alqoritmlərin işlənməsi” adlı elmi-tədqiqat layihəsi üzrə fəaliyyət planının müzakirəsinə həsr olunmuş seminar keçirilib.

Xeberler.az bildirir ki, bu barədə institutdan məlumat verilib.

AMEA-nın vitse-prezidenti, İnformasiya Texnologiyaları İnstitutunun baş direktoru akademik Rasim Əliquliyev çıxış edərək elmi-tədqiqat layihələrində, proqramlarında fəal iştirakın elmi fəaliyyətin səmərəliliyinin artırılması, institut əməkdaşlarının əməyinin stimullaşdırılması, eləcə də əldə edilən nailiyyətlərin geniş ictimaiyyətə çatdırılması baxımından vacibliyini qeyd edib. Alim Elm və Təhsil Nazirliyi tərəfindən maliyyələşdirilən elmi-tədqiqat layihəsinin İnformasiya Texnologiyaları İnstitutuna təqdim olunmasının instituta diqqət və etimadın göstəricisi olduğunu vurğulayıb.

Akademik R.Əliquliyev iclasın keçirilməsində əsas məqsədin layihə üzrə görüləcək işlər və qarşıda duran vəzifələri müəyyənləşdirməkdən ibarət olduğunu bildirib. Baş direktor layihə çərçivəsində kibersuveren dövlət sisteminin formalaşdırılması, onun etibarlılığının, təhlükəsizliyinin və dayanıqlığının təmin edilməsi istiqamətində strateji əhəmiyyətə malik tədqiqatların aparılmasının nəzərdə tutulduğunu diqqətə çatdırıb.

Sonra elmi-tədqiqat layihəsi üzrə hər bir icraçı cari ilin ikinci və üçüncü rübü ərzində yerinə yetiriləcək işlər, qarşıya qoyulan məsələlər haqqında məlumat verib.

Tədqiqat istiqamətləri ilə bağlı fikir mübadiləsi aparılıb, çoxsaylı suallar cavablandırılıb.

Sonda akademik R. Əliquliyev layihə çərçivəsində aktual problemlərlə bağlı aparılan tədqiqatların elmimizin inkişafına töhfə verəcəyinə əminliyini ifadə edib, qarşıya qoyulan elmi problemlərə dair təklif və tövsiyələrini səsləndirib.