QANUNVERİCİLİK

Mediada yer alan məlumatlara görə, millət vəkili Elmira Axundova ona gələn bezdirici SMS-lərə görə Bakcell –i məhkəməyə verəcəyini bildirib. Deputat tərəfindən dəfələrlə bu məsələ Milli Məclisdə qaldırılıb və abunəçilərə göndərilən bezdirici SMS-lər millət vəkilinin çıxışlarında öz əksini tapıb.

““Reklam haqqında” qanun təsdiqlənsə, artıq mobil operatorlar istədikləri vaxt müştərilərə SMS göndərə bilməyəcəklər. Göndərdikləri təqdirdə həmin şirkətlər cinayət məsuliyyətinə cəlb olunacaq”.

Bunu Xəbərlər-ə Millət vəkili Elmira Axundova bildirib. Deputat qeyd edib ki,  bir-iki həftə ərzində “Reklam haqqında” yeni qanun qəbul olunacaq və qanuna əsasən telekommunikasiya xidməti göstərən provayder reklamı yalnız abunəçi ilə bağlanılan müqavilədə  razılılıq olduğu halda fərdi qaydada yayımlaya biləcək:

“Digər tərəfdən provayderə məlumat üçün müraciət edən abonentin sorğusuna cavab verildikdən sonra reklam yayımlana bilər. Məlumat xidməti pullu olduqda, reklam yayımlanması arayışın dəyərinə daxil edilə bilməz”.

Deputat onu da əlavə edib ki,  Bakcell -i məhkəməyə verəcəyəm  ifadəsini Milli Məclisdə işlətməmişəm: “Demişəm ki, “Reklam haqqında” qanun təsdiqlənsə, artıq mobil operatorlar istədikləri vaxt müştərilərə SMS göndərə bilməyəcəklər. Məsələn, belə mesajlar daxil olur : 66 nəfər 16 min 600 manat udub. Siz də 4 qəpiyə 2 min manat uda bilərsiniz və s.  Məktəblilər, qocalar, cavanlar bu oyunlara aludə olur və gündə 1-2 manat itirirlər. Anlamırlar ki, bütün bunların hamısı yalançılıq, fırıldaqçılıq, dələduzluqdur. Biz dələduzluğa qarşı mübarizə aparırıq. Ona görə Milli Məclisdə  həmin şirkətlərdən xahiş və təkid etdim ki, bütün bunlara son qoyulsun”.

Mirvari Nəcəf