İKT REGİON

Məlumat verdiyimiz kimi, son vaxtlar regionlarda telekommunikasiya  sahəsində ciddi işlərə başlanılıb. Rabitə və yüksək texnologiyalar naziri Əli Abbasov da  çıxışlarında bu məsələyə xüsusi diqqət ayırdığını qeyd edir.

Xeberler.az-ın əməkdaşının Göygöl rayonundan verdiyi məlumata görə, hazırda Göygöldə həm rayondaxili, həm də ucqar kəndlərdə telekommunikasiya və İnternet xidmətlərinin keyfiyyətinin artırılması istiqamətində işlər aparılır.

Göygöl rayon Telekommunikasiya Qovşağının rəisi Vaqif Mirzəyev  Xeberler.az-a son altı  ayda rayonda bu istiqamətdə  görülən işlərdən danışıb.

Vaqif Mirzəyev bildirib ki, ilin birinci  yarısında “Regionların 2014-2018-ci illər ərzində sosial-iqtisadi inkişafı” Dövlət Proqramı layihəsinə uyğun olaraq əhalinin telekommunikasiya xidmətlərinə və genişzolaqlı sürətli İnternet xidmətinə olan təlabatların ödənilməsi məqsədilə Göygöl rayon telekommunikasiya qovşağından “Qarabağ məhəlləsi” nə yeni xətt təşkil etməklə 50 nömrənin çəkilişi üçün 27 ədəd rabitə dirəyi  basdırılıb.

Mərkəzi ATS-dən 1625 metr tutumlu TPP kabeller çəkilib. Onun sözlərinə görə, Göygöl rayonunun yeni yaşayış massivindəki mənzillər üçün tutumu 704 nömrə olan, Qırıxlı kəndində isə  telefona və genişzolaqlı sürətli İnternetə olan təlabatı ödəmək üçün 256 nömrə tutumlu rabitə avadanlıqları  alınıb. Beton bünövrələr tökülməklə stansiyalar quraşdırılıb. Hər iki stansiya ərazisində 4 min 50 metr optik kabellər çəkilib.

Rayon Telekommunikasiya Qovşağının  rəisi məlumat verib ki, bu il rayon üzrə 141 yeni abunəçiyə telefon çəkilib. Rayon üzrə telefon abunəçilərinin sayı 8 min 113-ə çatıb:

“Mərkəzi EATS-də Xaqani, Qırıqlı, Quşqara, Çaykənd, Üçtəpə , Yeni Qızılca və Aşıqlı-1 EATS-lərindən istismarda olan avadanlıqların tutumu üçün 832 portluq (artım 29,9%) sürətli İnternet avadanlıqları istifadəyə verilib.

Qeyd edək ki, hazırda Göygöl rayonunda həm rayondaxili, həm də ucqar kəndlərdə telekommunikasiya  və İnternetin  inkişafı   istiqamətində işlər davam edir. Bu barədə növbəti yazımızda məlumat verəcəyik.

Məltəm Talıbzadə,

Göygöl rayonu