İKT REGİON

Göygöl rayonunda rayon mərkəzindən uzaq olan ərazilərə İnternet çəkilişi  ilə  bağlı hazırda bir çox işlər həyata keçirilir.

Göygöl rayon Telekommunikasiya Qovşağının rəisi Vaqif Mirzəyev  Xeberler.az-a bu istiqamətdə görülən işlər barədə danışıb.

Vaqif  Mirzəyev bildirib ki, rayonda 2 şəhər və  21 kənd ATS-i fəaliyyət göstərir.

Onun sözlərinə görə, əvvəllər yalnız mərkəzi ATS-dən uzaq məsafələrə İnternet aparılırdı və bu zaman ciddi problemlər yaşanırdı:

“Uzaq məsafələrdə İnternetdən  istifadəni  yaxşı təşkil edə bilmirdik. İnternetin keyfiyyəti aşağı olurdu. Həmçinin İnternet  çəkilişi  zamanı ciddi problemlər yaranırdı. Xətlərdə qırılmalar baş verirdi”.

Qovşaq rəisi bildirib ki,  bu problemi nəzərə alaraq son illər bu problem üzərində ciddi tədbirlər planı  hazırlanıb. Belə ki, artıq mərkəzdən və ya  kənd ATS-dən  təqribən  2 kilometr  uzaq məsafədə  yerləşən  yaşayış məntəqələrinə  NGN tipli müasir stansiyalı ATS-lər  quraşdırılır.

“İki ildir ki, bu layihə üzərində işləyirik. Artıq Aşıqlı kəndində yeni NGN tipli ATS-i istifadəyə vermişik. Lakin kənd böyüdüyünə görə  daha bir 160 nömərli  ATS  quraşdırdıq. Həmçinin yeni ATS-lə  96 portluq  İnternet xidmətini ( ADSL)  də təmin etdik. Hazırda Aşağı Aşıqlı kəndində 80 nəfər, Yuxarı Aşıqlı-da isə  96  nəfər genişzolaqlı İnternetdən istifadə edir”.

Vaqif  Mirzəyev Xeberler.az–a bildirib ki, Yuxarı Aşıqlıdan Köşkü kəndinə  İnternet aparmaq üçün ( 3 kilometrlik məsafə)  ayrıca 96 nömrəli ATS  quraşdırılıb. Yuxarı Aşıqlıdan Köşküyə birbaşa optik xətt çəkilib.

Yeni Qırıxlı kəndində də 256 nömrəli ATS quraşdırılıb:

“Qırıxlı kəndindəki ATS köhnə idi. Kəndə yeni  yaşayış məskənləri salındı.  Hazırda evlərə İnternet çəkilişi  davam edir. Bu günlərdəki göstəriciyə görə artıq  35-dən  çox evə İnternet çəkilib”.

O əlavə edib ki, Qırıxılıda  köhnə ATS-in   boş tutum olan   200 nömrəsi hazırda 2 kilometr radiusda istifadə üçün paylanır. Bununla bağlı tikinti işləri başlayıb, montaj işləri həyata keçirilir.

Məltəm Talıbzadə