E - HÖKUMƏT

Azərbaycanın Müstəqillik Günü ərəfəsində ölkəmizin Moldova Respublikasındakı səfirliyində Azərbaycan və moldav xalq rəqslərinə həsr edilmiş poçt markalarının birgə buraxılışının rəsmi təqdimatı və markalara poçt ştempeli vurulması proseduru keçirilib.

Ölkəmizin Kişineudakı diplomatik nümayəndəliyindən Xeberler.az-a verilən məlumata görə, iki qardaş xalqın çoxəsrlik ənənələrini və bənzərsiz mədəniyyətini əks etdirən bu poçt markalarının buraxılışı Azərbaycanın Moldovadakı səfirliyinin təşəbbüsü, habelə Azərbaycanın Azərmarka və Moldovanın Poşta Moldovei”müəssisələrinin birgə fəaliyyəti sayəsində mümkün olub.

Markaların rəsmi təqdimatı mərasimində Azərbaycanın Moldovadakı səfiri, ölkəmizin Filatelistlər İttifaqının sədri Namiq Əliyev çıxış edib. Səfir vurğulayıb ki, bu markaların buraxılması hər iki ölkənin filatelistlərinin həyatında və mədəni sahədə Azərbaycan Prezidenti İlham Əliyevin milli mədəniyyətin təbliği üzrə siyasətinin həyata keçirilməsini təcəssüm etdirən mühüm hadisə kimi, Azərbaycan və Moldova xalqları arasında mədəni əlaqələrin daha da möhkəmlənməsinə xidmət edəcək.

Sonra çıxış edən Moldovanın mədəniyyət naziri Monika Babuk qeyd edib ki, bu əlamətdar hadisə Azərbaycan və moldav xalqlarının dostluğunu, onların mənəvi yaxınlığını və öz mədəni köklərinə bağlılığını bir daha nümayiş etdirir.

Tədbirdə Azərmarka məhdud məsuliyyətli cəmiyyətinin direktoru İntiqam Bağırlı və Poşta Moldovei dövlət müəssisəsinin baş direktorunun müavini Sergey Batyuşka çıxış edib. Daha sonra Azərbaycan və moldav xalq rəqslərinə həsr edilmiş poçt markalarına rəsmi poçt ştempeli vurulması proseduru keçirilib.

Tədbirdə Türkiyə, Bolqarıstan, Rusiya, Polşa, Gürcüstan, Belarus, Qətər və Ukraynanın Moldovadakı səfirləri, bu ölkənin Xarici İşlər və Avropaya İnteqrasiya Nazirliyinin nümayəndələri, Şərqi Moldova və Feleşt Yepiskopu Filaret, Moldova Respublikasının sabiq ombudsmanı Aureliya Qriqoriu, diplomatlar, universitetlərin rektorları, yaradıcılıq ittifaqlarının rəhbərləri, alimlər, incəsənət xadimləri, ictimai xadimlər, kolleksiyaçılar, Azərbaycan diasporunun üzvləri, jurnalistlər iştirak ediblər.

Tədbirdə Azərbaycan haqqında, Azərbaycan xalqının ümummilli lideri Heydər Əliyev haqqında poçt markalarının və mətbu nəşrlərin sərgisi təşkil edilib.

Xeberler.az