TƏDBİRLƏR

Dünən may ayında keçiriləcək Körpükamp layihəsinin tanıdılması üçün tədbir keçirildi.Tədbirdə Körpükamp layihəsinin məqsədi, keçiriləcəyi yer haqqında məlumat verildi. Daha sonra 27-29 martda Qafqaz Universitetində keçirilən “Barcamp Caspian 2009” haqqında kiçik həcmli filmin nümayişi oldu. Körpükamp haqqında təqdimatı “Barcamp Caspian 2009”un təşkilatçılarından biri olan İlqar Mirzə edib.

Körpükamp Barcamp Azərbaycan Təşkilatının yeni bir layihəsidir. Mahiyyət etibarilə Barcampa çox yaxındır, fərqi auditoriyasının daha spesifik olmasıdır. Körpükamp layihəsinin əsas məqsədi Qeyri-hökümət Təşkilatları, Media və İnternet birliyi yaradaraq cəmiyyətlə ünsiyyət qurmaq və informasiya mübadiləsi aparmaqdır. İlqar Mirzə qeyd etdi ki, son zamanlar Media müxtəlif təzyiqlərə məruz qalır, sıxışdırılır.Gənclər qəzetlərə və televiziyaya maraq göstərmirlər. İnternet daha azad və sərbəst olduğu üçün öndədir. Sayt yaratmaq üçün heç kimdən icazə alınmır. İnternetdə senzura yoxdur. Buna görə də Media və QHT İnternetlə əməkdaşlıq etməlidir. Körpükamp vasitəsilə İnternet, QHT və Media əməkdaşlığı yaradılacaq. Bu sahələri özündə əhatə edəcək yeni internet layihələrinin inkişafına kömək göstəriləcək.

Körpükampda yeni media mütəxəssisləri, internet jurnalistikası, bloggerlər, proqramçılar, QHT-lər, dizaynerlər, yeni layihə təqdim etmək istəyənlər və s. iştirak edə bilər. Körpükampda Barkampda olduğu kimi qeyri-rəsmi ünsiyyətdən istifadə edilir, təqdimat mövzularında sərbəstlik, seçim azadlığı verilir. Hər kəsin konfransda iştirak etmək hüququ var. Bir növ Körpükamp həm İnternet vərdişlərinin yaranması üçün çalışır, həm də əlaqələrini genişləndirir, kadr mübadiləsi etməyə kömək edir. Heç bir biznes marağı güdmür.

Körpükamp 2-3 mayda Azərbaycan Dillər Universitetinin nəzdində İnformasiya Resurs Kompleksində keçiriləcək. Layihənin maliyyə dəstəyi Soros fondudur.Təşkilati dəstək isə Azərbaycan İnternet Forumu və Azəri Yurdu GİB-nə məxsusdur.