TƏDBİRLƏR

14-16 avqustda, Gəncə şəhərində Emon Otelində “BarKamp Azərbaycan 2009, Gəncə” qeyri-konfransı təşkil olunacaq. BarKamp Azərbaycanda İnformasiya Texnologiyaları, İnternet və Yeni Media sahəsinə həsr olunmuş geniş konfransdır.

BarKamp-ın keçirilməsində məqsəd İT və Yeni Media mütəxəssisləri, istifadəçilər arasında təcrübə, informasiya mübadiləsi üçün qeyri-rəsmi ünsiyyət mühiti formalaşdırmaqla Azərbaycanda yeni İnternet və Yeni Media layihələrinin inkişafı üçün stimul verməkdir.

 Barkampa təcrübəli, o cümlədən də gənc mütəxəssislər və kadrlar, müxtəlif şirkət və layihələr cəlb edilir. "BarKamp Azərbaycan 2009, Gəncə" qeyri-konfransında İT və Yeni Media nümayəndələrinin, Bakı ilə yanaşı regionlardan da 200-250-yə yaxın mütəxəssisin, eləcə də bu sahə ilə yaxından maraqlananların və internet istifadəçilərinin iştirakı gözlənilir.

Bu konfransda iştirak edə bilər: - İnternet resurs layihələri hazırlayan mütəxəssislər (veb-dizaynerlər, proqramçılar, koderlər, kontentçılər, kopirayterlar, menecerlər. və s.); - Bloggerlər, netvorkçular, moderatorlar, yeni media jurnalistləri və mütəxəssisləri; - Uğurlu və ya uğursuz layihə tarixinə malik olanlar və onları inkişaf etdirmək istəyənlər, təcrübələrini bölüşmək, təcrübə əldə etmək istəyənlər; - Öz işlərini, layihələrini və nailiyyətlərini təqdim etmək istəyənlər; - Güclü kadr və birgə layihələr üçün tərəfdaş axtarışına çıxanlar; - Konfransın əhatəsində olan mövzular üzrə təhsil alanlar, tədris edənlər, eləcə də onlarla dərindən maraqlananlar.

Tədbirdə dövlət qurumları, İT şirkətləri və QHT nümayəndələri, eləcə də fondlar və müxtəlif biznes adamlarının iştirakı gözlənilir. "BarKamp Azərbaycan 2009, Gəncə" qeyri-konfransında iştirak etmək üçün qeydiyyat başlanılıb. Əlavə məlumatı www.barcamp.az saytından əldə etmək olar.

Xatırladaq ki, BarKamp Azərbaycanda ilk dəfə 2008-ci ildə, 29-31 avqust tarixində Lənkəran şəhərində keçirilmişdir. 2009-cu ildə, 27-29 mart tarixində isə Qafqaz Universitetində Beynəlxalq dərəcəli “BarCamp Caspian” təşkil olunmuşdur. 15 ölkədən iştirakçıların qoşulduğu bu tədbirdə ümumilikdə 450-dən çox şəxs iştirak etmişdir.