TV VƏ RADİO

  Media mütəxəssisi Zeynal Məmmədli millət vəkillərini nətisəsiz işdə günahlandırdı.Bu haqda \"Üç nöqtə\" qəzetinə məumat verən ekspert bildirib ki:  \"Millət vəkillərinin ictimaiyyətin diqqətini və rəyini bu məsələyə cəlb etmələrini alqışlayıram. Amma eyni zamanda onlar nəticə ilə oynayırlar. Nəticənin müzakirəsi heç nə verməyəcək. Səbəblərdən danışmaq lazımdır. Onlar ilk növbədə dövlətdən maliyyələşən kanalların proqramlarını araşdırmalı, komissiya yaratmalıdırlar.

  Qanuna nə dərəcədə əməl olunur. Məsələn, yazılır ki, xəbər plüralist olmalıdır. Bu telekanallarda olan xəbərlər plüralistdirmi? Bunlar dünyadakı ən qabaqcıl mədəniyyəti xəbərləməlidirlər, ən qabaqcıl mədəni əsərlərdən xəbər verməlidirlər. Dünya nəyi yaşayır, onu xəbərləməlidirlər. Azərbaycanın dövlətdən maliyyələşən kanalları olan AzTV və İTV bunu edirmi? Millət vəkillərinin birbaşa fəaliyyətinə qarışma imkanı məhz dövlətdən maliyyələşən kanallardır. Sən demə, onların bütün narazılıqları özəl televiziyalarda milli-mənəvi dəyərlərlə bağlı, nə bilim ictimai əxlaqla bağlı xoşagəlməyən örnəklərdir. Mən bunu qeyri-səmimilik sayıram. Çünki Azərbaycanda bütün ölkəni əhatə edən AzTV-ni və İTV-ni bir yanda qoyub, məhz özəl telekanalların üstünə düşmək 2 məqamdan xəbər verir. Ya bu adamların zövqü aşağıdır, ya da bilirlər ki, həmin TV-lərə müdaxilə qeyri-mümkündür. Və onlar siyasi iradəsizlik göstərib, dolayısı ilə \"qızım, sənə deyirəm, gəlinim sən eşit\" siyasətinə başlayıblar.

  Bütün bunları istənilən halda millət vəkillərinin ictimai rəyi bir az çaşdırması kimi qiymətləndirirəm. Məsələlərin mahiyyəti birbaşa deyilməlidir. Azərbaycan televiziyaları bütövlükdə hansı səbəblərdənsə çox geridir. Yəni Qafqaz məkanında da ən geri telekanal bunlardır. Ümumi dünyaya baxdıqda da Azərbaycan televiziyalarının istehsal etdiyi məhsul peşəkar, etik dəyərlər baxımından geridə qalıb. Özəlliklə də Azərbaycanda istehsal edilən tele-xəbər proqramlarıdır. Tele-xəbər proqramlarının harada efirə getməsindən asılı olmayaraq, istər özəl, istər dövlət kanallarında maliyyələşən kanallar etika ilə yanaşı, qanunla da tənzimlənir.

   Azərbaycan seyrçisinin əxlaqını pozan, Azərbaycan seyrçisini nimdaş göstərən təkcə əyləncə proqramlarıdırmı? Əgər debat, informasiya proqramlarını, sənədli filmləri yetərincə peşəkar etsələr, insanlar bununla maraqlanacaqlar. Artıq proqramı doldurmaq üçün ucuz, bayağı əyləncə proqramlarına yer qalmayacaq. Ucuz, əyləncə proqramları təkcə o məqsədlə verilmir ki, telekanallar bundan pul götürsün. Bu ondan irəli gəlir ki, başqa verilişlərlə pul qazanma imkanları yoxdur. Bu məsələlərin kökünə baxmaq lazımdır\".

xeberler.az