TƏHLİL

Daha öncə də məlumat verdiyimiz kimi, Azərbaycanın ilk beynəlxalq televiziyası olacaq “ATV İnternational” (“ATV İnt”) kanalı bu ayın sonlarında fəaliyyətə başlaya bilər.

Xeberler.az bildirir ki, ATV-nin “Xəbərlər” departamentinin baş redaktoru Vaqif Aydınoğlunun verdiyi məlumata görə, “ATV İnt” beş dildə xəbər yayımlayacaq. Azərbaycan, fars, ingilis, rus və erməni dillərində yayımlanacaq xəbərlər üçün 30-a qədər kadr seçilib.V.Aydınoğlunun sözlərinə görə, televiziya Azərbaycanın təbliği ilə bağlı yaradıldığından bu istiqamətdə xəbərlərə daha çox üstünlük veriləcək.

Erməni dilli kadrlara gəlincə, V.Aydınoğlunun sözlərinə görə, düşmən ölkənin dilində danışa bilən kadrlar doğrundan da azdır: “Erməni dilli kadrlar tapmaq çətin oldu. Gənc kadrlar arasında demək olar ki, bu dili bilən yoxdur. Bakı Dövlət Universitetində erməni dili hazırlığı keçilir. Lakin bu hazırlığı keçmiş şəxslər erməni dilini çox zəif bilirlər. Buna görə də biz xəbərlərin erməni dili üzrə qrupunu yaşlı nəslin hesabına təşkil etdik. Qrupda vaxtilə Ermənistan Dövlət Universitetində dərs demiş müəllim, erməni dilli qəzetlərdə işləmiş şəxslər var. Hələlik televiziyanın ”Xəbərlər" xidmətinin neçə saatdan bir efirə verilməsi üzərində müzakirələr gedir. Ümumilikdə isə “ATV İnt”-in bir xəbər buraxılışı 12-15 dəqiqədən ibarət olacaq".

Maraqlıdır, erməni dilində xəbərlərin hazırlanıb, efirə verilməsi nə dərəcədə əhəmiyyətlidir? Ümumiyyətlə, düşmən millətə xəbərçilik xidməti göstərmək üçün bunca vəsait və enerjiyə nə ehtiyac var?

Media eksperti Zeynal Məmmədli hesab edir ki, bu verilişlər Azərbaycanın potensial erməni vətəndaşları üçün nəzərə alınaraq hazırlanıbsa, anlaşılandır. Bu haqda Zeynal müəllim  "Yeni Müsavat" qəzetinə müsahibəsində bildirib.Onun fikrincə, bu addım Dağlıq Qarabağ probleminin həlli, eləcə də ölkəmizdəki sosial-mədəni gəlişmələrin sözügedən bölgədə yaşayan erməniləri nəzərə alaraq atılmış sayıla bilər: “Amma Ermənistandakı vətəndaşların buna qulaq asması nəzərə alınıbsa, bunun hər hansı əhəmiyyətini anlaya bilmirəm. Sırf bu məqsədlə həmin sahəyə pul və enerji xərclənməsini gərəksiz sayıram. Hesab edirəm ki, Azərbaycan və Ermənistan vətəndaşları arasında sürəkli, düşünülmüş debatların keçirilməsinə daha çox ehtiyac var, nəinki belə verilişlərin”.

Xeberler.az