Mərkəzi Bankın sədri Taleh Kazımov ötən gün Fintex Assosiasiyasının nümayəndələri ilə növbəti görüş keçirib.
Diqqət çəkən məqamdır.
Bunu Azərbaycan İnternet Forumunun prezidenti Osman Gündüz bildirib.
Bu görüşlə bağlı Osman Gündüz özünün sosial media hesabında aşağıdakıları qeyd edib:
"Çünki uzun illər ənənəvi, konservativ bank sistemi yeni fintex ekosistemin formalaşmasına ögey münasibət bəsləyib. Hətta bir çox hallarda mane olub.
Əvvəllər Mərkəzi Bank daim sektorda özünün hegemon rolunun saxlanılmasında maraqlı olub.
On illər ərzində fintex ekosistem üçün oyun qaydaları müəyyən edən "Ödəniş sistemləri və ödəniş xidmətləri haqqında Qanun layihəsinin qəbuluna imkan verilməyib.
Yalnız MB-nin yeni rəhbərliyinin təşəbbüsü ilə Milli Məclisdə müzakirəyə çıxarılıb və artıq bu qanun Prezident tərəfindən də təsdiqlənib.
Bundan sonra fintexlər də lisenziya ala biləcəklər.
Rəqəmsal bankçılıqda, açıq bankçılıqda uzun illər problemlər olub. Hansısa beynəlxalq ödəniş sistemlərinə daxil olanda Azərbaycanın dəstəklənmədiyini görmək adi hal olmuşdu.
Ötən günlər başa çatan Kibertəhlükəsizlik Forumunda çıxış edən Taleh Kazımov artıq bu tip məsələlərin prioritet olduğunu qeyd etdi.
Bank sektorunda, rəqəmsal bankçılıqda hələ bir çox problemlər də qalır.
Ölkəmizdə xaricdən ödənişlərin əldə olunmasında, qlobal ödəniş sistemlərinə inteqrasiyada, rəqəmsal manatın tətbiqində problemlər qalır. Ümid edirəm qısa zamanda bunlara da ciddi diqqət yetiriləcək.
Ölkənin startap ekosistemində fintex sektor xeyli aktivdir.
Ümid edirəm fintex qurumlarımız yeni mühitdən istifadə efərək daha da inkişaf edib, regional və qlobal bazarlara da çıxa biləcəklər.
MB rəhbərliyinin fintex ekosistemin, rəqəmsal və açıq bankçılıq sisteminin formalaşması istiqamətində səyləri təqdirəlayiqdir"
