"Ötən həftə Mərkəzi Bank “Ödəniş xidmətləri və ödəniş sistemləri haqqında” Qanun layihəsini yenidən müzakirə etdiyini açıqlayıb. Bəlkə də 77-ci dəfədir ki, Mərkəzi Bankın bu tip açıqlamalarını oxuyuram".
Xeberler.az bildirir ki,bu sözləri Azərbaycan İnternet Formunun Prezidenti, ekspert Osman Gündüz deyib:
"Bu dəfə layihəni yeni yaranan “Azərbaycan Fintex Assosiasiyası” ictimai birliyi ilə müzakirə edib. Əvvəllər Banklar Assosiasiyası ilə bu işi aparırdı. Qısa bir araşdırma ilə müəyyən etmək olar ki, 2013-cü ildən başlayaraq adı çəkilən qanun layihəsinin hazırlanacağı və ya hazır olması ilə bağlı MB dəfələrlə açıqlamalar verib.
Bir müddət bu işlə Maliyyə Bazarlarına Nəzarət Palatası məşğul olmuşdu. Bu qurum da açıqlamalar vermişdi ki, bəzi maliyyə qurumları belə bir qanun layihəsinin qəbulunda maraqlı deyillər. Fikrimcə adı çəkilən layihənin bu cür uzanmasının kökündə həm də Mərkəzi Bankın inhisarçılıq maraqları durur".
Ekspertin sözlərinə görə, Mərkəzi Bank rəqəmsal ödəniş ekosistemi bazarında həm tənzimləyici və həm də bazar subyekti kimi çıxş edir. Özünün nəhəng ödəniş sistemləri var. Hələlik bu bazara uzun vuruşmalardan sonra yalnız ASAN xidmət AsanPay ödəniş sistemini yaradaraq daxil ola bilib və digər ödəniş xidmətləri subyektlərinin inteqrasiyasına inkan yaradıb. Xatırlayıram ki, MB hətta bunu da qısqanclıqla qarşılamışdı.
"Prosesin uzun illər davam etməsi onun göstəricisi hesab oluna bilər ki, Mərkəzi Bank açıq-aşkar maraqlı deyil ki, bank olmayan, ödəniş xidməti təchizatçıları olan ödəniş təşkilatları bazara daxil olsun, alternativ innovativ ödəniş həlləri tətbiq edilsin. Əgər ediləcəksə də, belə görünür ki, bunu yalnız özü etmək fikrindədir.
Xatırlayıram ki, bu qədər müqavimətlə qarşılanan ikinci layihə yalnız Rəqabət Məcəlləsi ola bilər. Digər bu cür uzun müddət, heç olmasa müzakirəyə çıxarıla bilməyən layihə xatırlamıram.
Hətta 4 il bundan öncə qəbul olunan “2018-2020-ci illərdə Azərbaycan Respublikasında rəqəmsal ödənişlərin genişləndirilməsi üzrə Dövlət Proqramı”nda da bu qanunun qəbulu nəzərdə tutulub. Proqram da artıq başa çatıb, hələ də layihə ortada yoxdur.
Qonşu ölkələrin ödəniş sistemləri və ödəniş xidmətləri bazarına nəzərə salanada görmək olar ki , “Ödəniş xidmətləri və ödəniş sistemləri haqqında” Qanun layihəsinin 8 il uzadılması bizim Fintex ekosistemə, startap və innovasiya ekosisteminə nə qədər zərbə vurub. Düşünürəm ki, bunu MB-nin tanıdığım peşəkar mütəxəssisləri də çox gözəl bilirlər.
Ümid edirəm ki, sahə üzrə qərar qəbul edənlər də baş verənlərin fərqindədirlər.
Fiikrimcə biz bu sahədə çox ləngimələrə yol veririk.
Düşünürəm ki, MB kommersiya tipli ödəniş sistemləri yaratmaq əvəzinə Fintex qurumların göstərdiyi xidmətlərin effektiv tənzimlənməsinə, rəqəmsal ödəniş texnologiyalarının və “açıq bankçılığın” inkiaf etdirməsinə, qlobal ödəniş sistemlərinin (PayPal və s.) ölkəyə daxil olması üçün münbit şərait yaradılmasına diqqəti artırmalıdır".
