"The Global Fintech Index 2021 dərc olunub. Bu nüfuzlu Reytinq Cədvəli ölkələr və şəhərlər üzrə Fintex (bank-maliyyə ekosistemi ) sektorunun inkişaf göstəricilərini təqdim edir. Azərbaycan bu il də bu nüfuzlu reytinq cədvəlinə daxil ola bilməyib".
Xeberler.az bildirir ki, bu sözləri Azərbaycan İnternet Formunun Prezidenti Osman Gündüz deyib.
Ekspertin sözlərinə görə, 83 ölkənin yer aldığı son reytinq cədvəlinə ilk dəfə olaraq Qazaxstan və Gürcüstan da daxil ola biliblər.
"Fintex ekosistemin inkişafını ölçmək üçün bu sahədə mövcud startapların kəmiyyət və keyfiyyət göstəriciləri, ekositemin tənzimlənməsi vəziyyəti əsas götürülür.
Azərbaycanda maliyyə-bank texnologiyalarının inkişafı istiqamətində məyyən işlər görülsə də ciddi problemlər uzun illərdi həll olummur.
“Ödəniş xidmətləri və ödəniş sistemləri haqqında” Qanun layihəsinin 10 il uzadılması bizim Fintex ekosistemə, startap və innovasiya ekosisteminin inkişafına ciddi zərbə vurub.
Mərkəzi Bank, Banklar Assosiasiyası və yeni yaranan Fintex Assosiasiya dəfələrlə bu qanunun qəbulu ilə bağlı açıqlamalar versə də görünən budur ki ortada layihə yoxdur.
Hətta 2020-ci ildə başa çatan dövlət proqramında bu qanunun hazırlanması və qəbulu nəzərdə tutulsa da cavabdeh qurumlar bunu reallaşdıra bilməyiblər. Düşünürəm ki, Mərkəzi Bankın rəqəmsal ödəniş ekosistemi bazarında həm tənzimləyici və həm də bazar subyekti kimi çıxış etməsi maraq toqquşmaları yaradır ki, nəticədə də Fintex ekosistemin inkişafı ləngiyir.
Fikrimcə, startap ekosistemin, innovasiyaların inkişafına cavabdeh dövlət qurumları, Milli Məclis bu qanun layihəsinin qəbulu üçün səyləri gücləndirməlidir".
