AZNET

Bildirdiyimiz kimi Banklar Assosiasiyası "Fintex Summit"- Maliyyə və Texnologiyalar Sammiti təşkil edib.

Xeberler.az bildirir ki, bu barədə Azərbaycan İnternet Forumunun Prezidenti, ekspert Osman Gündüz öz Feysbuk səhifəsində paylaşım edib.

“Hər il keçirilən bu tədbir maliyyə - bank sektorunda rəqəmsal transformasiya üçün yaxşı platformadır.

Ölkənin maliyyə-bank sektoru da yetərincə konservativdir. Uzun –uzadı müzakirələr aparılmasına baxmayaraq bu sektorda da rəqəmsallaşma və innovasiyalar ləng tətbiq edilir.

Amma bu dəfə Mərkəzi Bankın baş direktoru Fərid Osmanov Açıq Bankçılıq məsələsinin üzərində daha çox dayandı, standartların hazırlanıb başa çatdırıldığını və gələn ildən tətbiq olunacağını bildirdi.

Hansı ki, bu standartlar uzun müddətdir ki, Avropada təsdiq olunub və bütün banklar üçün məcburidir.

Bizdə isə hələ də banklar elə bilir ki, müştərinin məlumatları yalnız və yalnız ona məxsusdur və müştərinin razılığı olsa belə bu məlumatlar heç bir fintex quruma verilə bilməz. Yəni, müştəri hansısa bir fintex qurumun tətbiqi ilə öz bank resurslarını idarə edə bilməz.

Belə olan halda isə fintexlərin inkişafı ləngiyir, müştərilər bank resurslarından effektiv istifadə edə bilmir.

Bu il keçirilən tədbirdə də diqqət çəkən məqam həm də ondan ibarət oldu ki , yenə də “Ödəniş sistemləri və ödəniş xidmətləri” haqqında qanunun qəbulunun növbəti ildə nəzərdə tutulması haqqında mesajlar verildi.

Hansı ki, ötən illər təşkil olunan bu tədbirlərin arxivlərinə baxanda görmək olar ki eyni məzmunlu açıqlamalar o zamanlar da verilib.

Yeni yaranan Fintex Assosiasiyanın və e-Manatın rəhbəri Ruslan müəllim isə Mərkəzi Bankın həm tənzimləyici və həm də bazar iştirakçısı olmasına diqqəti yönəltdi.

Rəqəmsal İnkişaf və Nəqliyyat Nazirinin müavini Fərid Əhmədov isə yalnız maliyyə-bank sektorunda deyil, cəmiyyətin bütün sahələrində rəqəmsal transformasiyanın vacibliyini diqqətə çatdırdı. Yaxın zamanlarda bütün ölkə üzrə geniş zolaqlı internet infrastrukturun qurulmasının başa çatdırılacağını bildirdi.

Bir müddət öncə Mərkəzi Bankın rəhbərliyi dəyişib.

Sektorda rəqəmsal transformasiya və innovasiyaların tətbiqi, hazırda banklarda mövcud olan mənasız məhdudiyyətlərin aradan qaldırılması, elan olunmasına baxmayaraq hələ də tətbiq olunmayan elektron rezidentlik proqramının icrasına start verilməsi və qlobal ödəniş sistemlərinin, xüsusilə də PayPal-ın ölkəyə gətirilməsi ilə bağlı yeni rəhbərlikdən gözləntilər çoxdur.

Hələlik isə bu haqda konkret mesajlar verilməyib.

Düşünürəm ki, Açıq Bankçılıq prinsiplərinin bütün banklar üçün məcburiliyi və adı çəkilən qanunun qəbulu sektorda vəziyyəti xeyli yaxşılaşdıra bilər.”