TƏHLÜKƏSİZLİK

Cari ilin 31 oktyabr tarixində Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə Azərbaycan Kibertəhlükəsizlik Təşkilatları Assosiasiyası (AKTA) tərəfindən icra edilmiş “Milli Kibertəhlükəsizlik İndeksinin yaradılması və ölkədə kibertəhlükəsizlik səviyyəsinin qiymətləndirilməsi” layihəsinin təqdimat mərasimi keçirilib.

Xeberler.az məlumat verir ki, tədbirdə kibertəhlükəsizliyin təmin olunması sahəsində səlahiyyətli dövlət qurumlarının, o cümlədən Azərbaycan Respublikası Dövlət Təhlükəsizliyi Xidmətinin, Xüsusi Rabitə və İnformasiya Təhlükəsizliyi Dövlət Xidmətinin, Rəqəmsal İnkişaf və Nəqliyyat Nazirliyi yanında Elektron Təhlükəsizlik Xidmətinin, İnnovasiya və Rəqəmsal İnkişaf Agentliyinin, habelə Qeyri-Hökumət Təşkilatlarına Dövlət Dəstəyi Agentliyinin nümayəndələri, eləcə də AKTA-nın inzibati heyəti, üzvləri və ekspertləri iştirak edib.

Tədbirdə çıxış edən AKTA İdarə heyətinin sədri Elvin Balacanov Milli Kibertəhlükəsizlik İndeksinin yaradılması və ölkədə kibertəhlükəsizlik səviyyəsinin qiymətləndirilməsi məqsədilə icra olunan layihə çərçivəsində həyata keçirilən tədbirlər, yaradılmış qiymətləndirmə platforması və həyata keçirilmiş qiymətləndirmənin nəticələri, eləcə də, indeksə dair ölçü meyarları və qiymətləndirmə mexanizminə dair məlumatları tədbir iştirakçılarının diqqətinə çatdırıb. Layihənin icrası zamanı qarşıya çıxan çətinliklər və sahə üzrə bəzi mövcud problemlər barədə məlumatlar isə layihə rəhbəri Təbriz Cəfərov tərəfindən işitrakçılara təqdim olunub.

Tədbirdə Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin icraçı direktoru xanım Aygün Əliyeva çıxış edərək, son illər ərzində müxtəlif sahələrdə, o cümlədən kibertəhlükəsizlik sahəsində qeyri-hökumət təşkilatlarının artan rolu, habelə QHT sektorunun inkişaf etdirilməsində Agentlik tərəfindən tətbiq olunan dəstək mexanizmləri barədə məlumat verib. AKTA tərəfindən icra edilmiş layihənin ölkənin kibertəhlükəsizlik ekosisteminin qiymətləndirilməsi üçün mühümlüyünü vurğulayan xanım Aygün Əliyeva, layihənin icra edilməsinin təqdirəlayiq hesab edildiyini və gələcəkdə də ekosistem subyektlərinin kibertəhlükəsizlik vəziyyətinin davamlı qiymətləndirilməsinin məqsədəuyğun olduğunu bildirib.

Layihə çərçivəsində görülmüş işlərin müzakirəsi zamanı çıxış edən Rəqəmsal İnkişaf və Nəqliyyat Nazirliyi yanında Elektron Təhlükəsizlik Xidmətinin (ETX) rəis müavini Elvin Şahverdiyev ekosistemin özəl sektor üzrə subyektlərinin qiymətləndirilməsinin vacibliyini vurğulayaraq, bu sahədə milli indeksləşdirmənin tətbiq edilməsinin kibertəhlükəsizlik sahəsindəki inkişafa əhəmiyyətli töhfə verəcəyini bildirib. Müzakirədə iştirak edən Dövlət Təhlükəsizliyi Xidmətinin nümayəndəsi layihə çərçivəsində görülmüş işlərin təqdirəlayiq olduğunu qeyd edərək, gələcəkdə özəl sektorun müxtəlif sferaları üzrə daha dərin qiymətləndirmələrin həyata keçirilməsinin ekosistemə mühüm töhfələr verə biləcəyini qeyd edib. Xüsusi Rabitə və İnformasiya Təhlükəsizliyi Dövlət Xidmətinin nümayəndəsi Vüqar Həsənov, AKTA tərəfindən həyata keçirilmiş qiymətləndirmə nəticələrinə münasibət bildirərək, qeyd edib ki, qiymətləndirmənin əhatə dairəsinin daha da genişləndirilməsi, özəl sektor üzrə subyektlərin qiymətləndirmədə daha aktiv iştirakının təşviq edilməsi istiqamətində müvafiq addımların atılması məqsədəuyğun olardı.

Tədbir AKTA üzv və ekspertlərinin, o cümlədən qiymətləndirmədə iştirak etmiş şirkət və təşkilatların rəhbər və nümayəndələrinin AKTA tərəfindən icra edilmiş layihə və aparılmış qiymətləndirmə barədə müvafiq fikir, mülahizə və təkliflərininin dinlənilməsi və müzakirəsi formasında davam edib.