PROQRAMLAR

AKTA il ərzində kibertəhlükəsizlik və informasiya texnologiyaları sahəsində fəaliyyət göstərən şirkətləri və ekspertləri bir araya gətirərək ölkənin kibertəhlükəsizlik ekosisteminin gücləndirilməsinə töhfə verib.

Xeberler.az bildirir ki, bu barədə Azərbaycan Kibertəhlükəsizlik Təşkilatları Assosiasiyasının (AKTA) icraçı direktoru Rauf Cabarov bildirib. Onun sözlərinə görə, il ərzində müxtəlif mövzularda təşkil olunan 80 tədbirdə 8 mindən çox mütəxəssis, dövlət və özəl qurumların nümayəndələri iştirak ediblər.

R.Cabarov qeyd edib ki, AKTA “Konstitusiya və Suverenlik İli” çərçivəsində xüsusi əhəmiyyət daşıyan tədbirlər həyata keçirib. Bu çərçivədə Naxçıvanda təşkil olunan Kiber Suverenlik Konfransı ölkənin bütün regionlarında kibertəhlükəsizliyə diqqətin artırılması baxımından mühüm mesaj olub.

İcraçı direktor vurğulayıb ki, AKTA fəaliyyətində təhsil sahəsinə də xüsusi önəm verib. Universitetlərdə yaradılan kiberklublar, həyata keçirilən müxtəlif layihələr və ənənəvi Kiber Yay Məktəbi bu istiqamətdə əsas təşəbbüslər sırasındadır. Bildirilib ki, Kiber Yay Məktəbinə xarici ölkələrdən də iştirakçılar qoşulub və 150-yə yaxın məktəbli, tələbə və kiber klub üzvü burada təhsil almaq imkanı əldə edib.

R.Cabarov əlavə edib ki, AKTA bu fəaliyyətləri 2026-cı ildə də davam etdirəcək. Hazırda AKTA-nın 170-ə yaxın üzvü olduğunu deyən icraçı direktor vurğulayıb ki, şirkətlər və ekspertlərlə birgə ölkənin kibertəhlükəsizliyinin gücləndirilməsi istiqamətində işlər davam etdiriləcək.

O, həmçinin süni intellektin sürətli inkişafı və kibertəhdidlərin artdığı bir dövrdə yalnız biznes səviyyəsində deyil, eyni zamanda, əhalinin və xüsusilə kiçik və orta biznes subyektlərinin maarifləndirilməsinin vacibliyini diqqətə çatdırıb və bu sahədə dəstəyin prioritet istiqamətlərdən biri olacağını bildirib.