TEXNOLOGİYA

Virciniya Politexnik İnstitutu və Dövlət Universitetinin tədqiqatçıları mis məmulatlarının istehsalının daha səmərəli, sadə və əlyetərli metodu üzərində işləyirlər. Universitetin maşınqayırma fakültəsinin dosenti Kristofer Uilyams və onun rəhbərlik etdiyi işçi qrup mislə çap edən 3D-printer hazırlayıb.

Xeberler.az AzərTac-a istinadən xəbər verir ki, Kristofer Uilyams bildirib ki, unikal 3D-printer hazırlayıblar: “Mislə işləmək son dərəcə çətindir. Lakin biz əlaqələndirici maddənin səpilməsi metodundan istifadə edirik. Bu zaman çap edən başlıq yapışqanı mis tozuna yeridir və bu proses hər qatda təkrarlanır. Sonra məmulatı sobaya yerləşdiririk ki, toz hissəcikləri öz aralarında ərisin və bişsin. Bu yolla mis məmulatının ən mürəkkəb formasını da istehsal etmək mümkündür”.

Bu üsul kifayət qədər perspektivli görünür, lakin həllini gözləyən bəzi məsələlər də var. Əsas çətinlik ondan ibarətdir ki, mis hissəciklərinin sobada əridilməsindən sonra onların arasında kiçik hava sahələri qalır. Nəticədə detallar emal və ya cilalanma kimi ənənəvi metodlarla istehsal edilmiş məhsullardan daha kövrək alınır. Hazırda mütəxəssislər toz hissəciklərinin arasındakı boşluqların doldurulması və məmulatın sıxlığının yüksəldilməsi istiqamətində işlər görürlər.

Çatışmazlıqlar aradan qaldırılarsa, alimlərin ixtirası beş il ərzində cəmiyyət üçün əlyetərli olacaq və bütün sahələrdə tətbiq ediləcək.