PROQRAMLAR

Məhkəmə qərarlarının vaxtında və səmərəli icrası ədalət mühakiməsinin əsas tərkib hissəsidir və bu sahədə rəqəmsallaşma ilə süni intellekt texnologiyalarının tətbiqi xüsusi əhəmiyyət daşıyır.

Xeberler.az məlumat verir ki, bunu ədliyyə nazirinin müavini Toğrul Hüseynov Azərbaycan Hakimlərinin II Forumu çərçivəsində keçirilən "Rəqəmsallaşma və süni intellektin tətbiqi imkanları" adlı panel müzakirəsi zamanı bildirib.

Onun sözlərinə görə, ənənəvi icra prosesində icra növbələrinin uzanması, borcluların aktivlərinin müəyyənləşdirilməsində çətinliklər, qurumlararası koordinasiyanın zəifliyi və statistik uyğunsuzluqlar mövcud olub. Rəqəmsallaşdırılmış icra mexanizmləri bu problemlərin aradan qaldırılmasına imkan verib.

Nazir müavini qeyd edib ki, elektron icra informasiya sistemi vasitəsilə qərarların icrası sürətlənib, məlumat mübadiləsi operativləşib və şəffaflıq təmin olunub. 2025-ci ilin mayında qüvvəyə minmiş qanunvericilik dəyişiklikləri isə icra sənədlərinin yalnız elektron qaydada qəbulunu və icra prosesinin tam rəqəmsal əsasda aparılmasını mümkün edib.

Toğrul Hüseynov deyib ki, borclu şəxslərin ölkədən çıxışına məhdudiyyətlərin tətbiqi və aradan qaldırılması elektron sistemlər üzərindən həyata keçirilir, bu barədə şəxslərə SMS bildirişlər göndərilir.

Çıxışda, həmçinin elektron hərrac mexanizmlərinin genişləndirilməsinin iştirakçı sayını artırdığı və borclunun əmlakının daha ədalətli bazar dəyəri ilə satışına şərait yaratdığı vurğulanıb.

Nazir müavininin sözlərinə görə, bu islahatlar icra prosesində çevikliyi artırmaqla yanaşı, vətəndaşların ədalət mühakiməsinə çıxış imkanlarını da genişləndirir. (Azərtac)