TƏHLİL VƏ RƏYLƏR

Son günlər vətəndaşlar  Azərpoçt  MMC-nin  xidmətindən  narazılıqlarını bildirir.

Vətəndaşlar qeyd edir ki, onlar sadə və sifarişli məktublarda müxtəlif növ yazılı məlumat, iş kağızları, fotoşəkillər, bədii açıqcalar, sxemlər və başqa oxşar çap məhsullarını  özləri aldığı zərflərdə Azərpoçt-dan göndərə bilmirlər.

Qeyd edilir ki, istifadəçilər mütləq Azərpoçt-a məxsus  möhürlü zərfləri almalıdırlar. Müxtəlif bəhanələrlə vətəndaşların zərfləri qəbul edilmir və məcbur edilir ki, yalnız Azərpoçta məxsuz zərfləri ödəniş edib almalıdırlar.

Xeberler.az olaraq, məsələni araşdırmaq üçün Azərpoçtun 1 saylı filialının 7 saylı  Poçt Şöbəsinə yollandıq.

Özümüz aldığımız adi zərf vasitəsi ilə məktubu göndərməyə çalışdıq. Lakin zərfi qəbul etmədilər və bizə məlumat verildi ki, mütləq Azərpoçt-a məxsus zərfləri almalıyıq.

Öyrəndik ki, sadə formada göndəriləcək zərfin qiyməti 60-70 qəpikdir, sifarişli məktubların qiyməti isə 1 manatdan yuxarıdır.

Yəni, bu o deməkdir ki , hər hansı bir təşkilat və ya şirkət öz loqosu olan zərflə qeyd olunan ödənişi etsə də Azərpoçt vasitəsilə məktubu göndərə bilməz. Mütləq tələb olunur ki, Azərpoçta məxsus və markası qabaqcadan üstlərinə yapışdırılan zərflərdən istifadə olunmalıdır.

Xeberler.az problemlə bağlı RYTN-nin  poçt sektorunun müdiri Novruz Məmmədovla əlaqə saxlayıb.

Məsələyə aydınlıq gətirən şöbə müdiri bildirib ki, istənilən halda vətəndaş zərf və marka üçün  ödəniş etməlidir:

“Markalar sifarişə uyğun olaraq müxtəlif qiymətdə satılır. Zərfə məktubun göndəriş  dəyərinə uyğun marka yapışdırlır”.

Novruz Məmmədov qeyd edib ki, müştəri bu xidmətdən istifadə edərkən heç nə itirmir. O hesab edir ki, Azərpoçt əslində bu xidməti ilə onların işini asanlaşdırır və məktubların göndərilməsinə nəzarət edə bilir. Onun sözlərinə görə, vətəndaşın fərdi şəkildə hazırlayacağı zərfin qiyməti ilə Azərpoçt-un təklif etdiyi qiymətdə elə də böyük  fərq yoxdur. 

Novruz Məmmədovun sözlərinə görə, vətəndaş 3-5 məktubla markası olduğu halda poçtla müraciət edirsə, poçt işçilərinin onları  Azərpoçt-un zərfindən istifadəyə məcbur etməsi doğru deyil. Biz qarşılaşdığımız problemi də qeyd etdik ki,  bir məktubla yaxınlaşmışdıq, buna baxmayaraq bizə poçtun zərfini almaq təklif olundu.

Novruz Məmmədov bunu qanunsuz hesab edib.

Mövzuya qayıdacağıq.

Məltəm Talıbzadə