TƏHLÜKƏSİZLİK

Kibertəhlükəsizliklə bağlı problemlərin həllinin ən vacib sütunlarından biri insan resursları və potensialıdır. Eləcə də hər sahədə olduğu kimi kibertəhlükəsizlik sahəsində beynəlxalq əməkdaşlığın inkişafında gənc nəsil mütəxəssislərin olması vacib amildir.

Xeberler.az məlumat verir ki, bunu ADA Universitetinin Dövlət, tələbə və xarici işlər üzrə prorektoru Fariz İsmayılzadə Bakıda keçirilən Kiberdiplomatiya üzrə Beynəlxalq Konfransda çıxışı zamanı deyib.

“Texnologiya o qədər sürətlə dəyişir ki, bu istiqamətdə risklərin bəzilərini hətta proqnozlaşdırmaq mümkün olmur. Belə ki, mütəmadi olaraq mütəxəssislərin hazır olmadığı yeni istiqamətlər meydana çıxır. ADA Universitetinin məlumat analitikası üzrə mütəxəssislər hazırlamaq üçün ABŞ-da fəaliyyət göstərən Corc Vaşinqton Universiteti ilə proqramı var. Universitet məlumat analitikası üzrə mütəxəssislər hazırlamaq üçün xarici universitetlərlə tərəfdaşlıq edir. Bu, Azərbaycanda gənc mütəxəssisləri böyük məlumatları təhlil etmək, böyük məlumatlardan istifadə etmək üzrə hazırlayan ilk proqramlardan biridir”, - deyə Fariz İsmayılzadə əlavə edib.

Həmçinin F.İsmayılzadə qeyd edib ki, ADA Universiteti yeni innovasiyalar və yeni texnologiyaların tətbiqini daim diqqət mərkəzində saxlayır: “Çünki yeni texnologiya, innovasiya və startaplara diqqət yetirmədən kiberhücumlar, kibertəhdidlər və bu kimi risklərdən tam qorunmaq mümkün deyil. Xüsusi Rabitə və İnformasiya Təhlükəsizliyi Dövlət Xidməti, Azərbaycan Diplomatik Akademiyası (ADA) və Rumıniyanın İnformatika üzrə Milli Tədqiqat və İnkişaf İnstitutu arasında imzalanan üçtərəfli Anlaşma Memorandumu kiberdiplomatiya sahəsində tədqiqat, təhsil və bacarıqların artırılmasını təşviq etmək üçün kadr potensialının gücləndirilməsinə böyük töhfə verəcək”.