SÜNİ İNTELLEKT VƏ DATA

Qazaxıstan hökuməti sosial müdafiə, ekoloji və sənaye sahələrində süni intellektdən istifadə edir.

Xeberler.az məlumat verir ki, Qazaxıstanın Baş naziri Olcas Bektənov ölkədə rəqəmsal texnologiyaların və süni intellektin tətbiqi ilə bağlı hökumətin geniş iclasında məlumat verib. Onun sözlərinə görə, hazırda sosial müdafiə, ekoloji məsələlər, fövqəladə hallar və sənaye sahələrində böyük verilənlər əsasında qərar qəbul etmə prosesində süni intellektdən istifadə olunur.

Bektənov 2024-cü ildə dövlət xidmətlərinin göstərilməsi prosesində süni intellekt əsaslı virtual köməkçinin tam şəkildə istifadəyə veriləcəyini açıqlayıb. Bu sistem vətəndaşlara müraciət etdikləri hallarda onların vəziyyətinə uyğun olaraq lazımi xidmətləri təklif edəcək və izah edəcək.

Baş nazir, həmçinin Qazaxıstanın ilk yerli süni intellekt dil modeli "KazLLM"-in yaradıldığını bildirib. Bundan əlavə, "AI-Sana" proqramı çərçivəsində bu il 100 min tələbəyə süni intellektin iqtisadi sahələrdə tətbiqi üzrə praktiki biliklər öyrədiləcək.

Ölkənin 20 universitetində süni intellekt sahəsində mütəxəssis hazırlığına start verilib və "Bolashaq" proqramı çərçivəsində bu sahə üzrə ayrıca kvota ayrılıb.

Qazaxıstan Prezidenti Kasım-Jomart Tokayev süni intellektin inkişafının sürətləndirilməsinin vacibliyini vurğulayıb. O, süni intellekt elementlərinin elektron hökumət sisteminə inteqrasiya edilməsini və "Ağıllı Şəhər" ("Smart City") layihələrində geniş istifadə olunmasını vacib hesab edir.

Dövlət başçısının sözlərinə görə, hökumət rəqəmsallaşma və süni intellektin tətbiqi üçün vahid sistem yaratmalıdır.