TƏDBİRLƏR

İqtisadi İslahatların Təhlili və Kommunikasiya Mərkəzində (İİTKM) “Bir Pəncərə” İxraca Dəstək Mərkəzinin təşkilatçılığı ilə “Rəqəmsal Texnologiyaların PR aləti olaraq istifadə olunması” mövzusunda təlim keçirilib.

Xeberler.az-ın məlumatına görə, təlimi Humfrey təqaüd proqramı çərşivəsində ABŞ-ın Maryland Universitində təhsil almış Azərbaycanın tanınmış PR mütəxəssisi,Azər Nəzərov aparıb.

30 – dan artıq şirkət və qurum təmsilçisinin iştirak etdiyi təlimin əsas məqsədi Azərbaycan sahibkarlarının öz məhsullarını xarici bazarlarda tanıdılması istiqamətində atmalı olduğu addımlar barədə ətraflı məlumatların təqdim olunmasıdır.

Təlim zamanı rəqəmsal alətlərdən PR aləti olaraq istifadə, rəqəmsal PR strategiyasının hazırlanması, rəqəmsal alətlər vasitəsi ilə bazar analizinin aparılması, ödənişli vasitələrdən PR aləti olaraq istifadə, rəqəmsal fəaliyyətlərin analizi və hesabatların hazırlanmasından danışılıb.

 “Bir Pəncərə” İxraca Dəstək Mərkəzinin meneceri Nicat Hacızadə bildirib ki, Azərbaycan məhsullarını xarici bazarlarda tanıtmaq, onların marketinq və kommunikasiyasını təşkil etmək qarşıya qoyulan əsas hədəflərdən biridir.

Onun sözlərinə görə, ölkəmizin xarici bazarlarda rəqabət qabiliyyətliliyini artırmaq məqsədilə nəzərdə tutulan bu təlimlər qarşıdakı müddətdə də davam etdiriləcək.

Təlimlərdə iştirak edən sahibkarlar məhsullarının xarici bazarlarda satışı, beynəlxalq standartların tətbiqi, maliyyə alətlərindən istifadə qaydalarını öyrənirlər.

 Azər Nəzərov İqtisadi İslahatların Təhlili və Kommunikasiya Mərkəzi və “Bir Pəncərə” İxraca Dəstək Mərkəzinin təşkilatçılığı ilə belə bir təlimin keçirilməsini sevindirici hal kimi qiymətləndirib.

O deyib ki təlim zamanı yerli ixracyönümlü sahibkarların xarici ölkələrdə daha yaxşı tanıdılması, imicinin formalaşması üçün lazım olan texniki və nəzəri biliklərdən danışılacaq.  

Onlara imicin rəqəmsal alətlər vasitəsi ilə qurulması və qorunması, bazar analizinin aparılması, Rəqəmsal PR strategiyasının hazırlanması və hədəf auditoriyasının profilinin müəyyən olunması kimi biliklər ötürülüb.