RƏQƏMSAL DÜNYA

Azərbaycanda rəqəmsal sahə üzrə kadr potensialının gücləndirilməsi istiqamətində hansı addımların atılmalı olduğunu müəyyənləşdirmək məqsədilə Rəqəmsal İnkişaf və Nəqliyyat Nazirliyi və Elm və Təhsil Nazirliyi birlikdə diaqnostik təhlil aparıb. Təhlil zamanı bir sıra maraqlı məqamlar üzə çıxıb. Araşdırmalar göstərdi ki, Azərbaycanda rəqəmsal sahə üzrə məzunların sayı hazırda əmək bazarının tələbatını ümumilikdə qarşılayır.

Xeberler.az məlumat verir ki, bu fikirləri jurnalistlərə müsahibəsində rəqəmsal inkişaf və nəqliyyat nazirinin müavini Rəşad Həsənov deyib. O bildirilib ki, bir çox məzun ixtisasına uyğun iş tapmaqda çətinlik çəkir: “Təhlillər nəticəsində məlum olub ki, əsas səbəblərdən biri təhsilin keyfiyyətinin bir çox hallarda müasir əmək bazarının tələblərinə tam cavab verməməsidir. Eyni zamanda, təhsil prosesinin daha çox nəzəri istiqamətdə olması və tələbələrə praktiki biliklərin kifayət qədər aşılanmaması əsas problemlərdən biridir. Bu kontekstdən çıxış edərək Elm və Təhsil Nazirliyi ilə birgə bir sıra layihələr həyata keçirilib və bu gün təsis olunan AZCON Mühəndislik və Texnologiya Məktəbi (AZSET) həmin istiqamətdə atılan strateji və unikal addımlardan biridir”.

Rəşad Həsənov qeyd edib ki, layihənin unikallığı iki əsas məqamla bağlıdır: “Birinci məqam ondan ibarətdir ki, bu, Azərbaycanda sənaye ilə akademiyanın bu qədər sıx əməkdaşlıq etdiyi ilk layihələrdən biridir. AZCON Holding tələbələrin seçimindən başlayaraq onların təhsil müddətində dəstəklənməsinədək təhsil prosesinin bütün mərhələlərində iştirak edəcək. Bu dəstək mentorluq proqramları, təcrübə imkanları və digər mexanizmlər vasitəsilə həyata keçiriləcək. Eyni zamanda, kurikulumun hazırlanmasında AZCON Holding iştirak edəcək ki, bu da tələbələrin praktiki bilik və bacarıqlar əldə etməsinə mühüm töhfə verəcək. Layihənin ikinci mühüm üstünlüyü tərəfdaş universitet kimi Almaniyanın Münxen Texniki Universitetinin (TUM) iştirakıdır. TUM bu sahədə dünyanın ən qabaqcıl ali təhsil müəssisələrindən biridir. Universitet müxtəlif beynəlxalq reytinqlərdə davamlı olaraq ilk 20-likdə yer alır və Avropanın aparıcı universitetlərindən hesab olunur. Alman akademik heyətinin kurikulumun hazırlanmasında və tədris prosesində iştirakı, eləcə də müxtəlif təcrübə proqramlarının təşkili tələbələrimizin bilik və bacarıqlarının inkişafına ciddi töhfə verəcək. Ən uğurlu tələbələrin qısamüddətli proqramlar çərçivəsində Münxen Texniki Universitetinin kampusunda təhsil almaq imkanı da olacaq. Bu layihə həm Azərbaycan Texniki Universiteti, həm də ümumilikdə ölkənin təhsil sistemi üçün mühüm əhəmiyyət daşıyır”.