TEXNOLOGİYA

Azərbaycanda rəqəmsal infrastruktura qoyulan investisiyalar nəticəsində ölkədə data mərkəzlərinin sayı artmaqdadır.

Xeberler.az məlumat verir ki, bunu "Bakı Enerji Forumu"nda çıxışı zamanı rəqəmsal inkişaf və nəqliyyat nazirinin müavini Samir Məmmədov deyib.

Nazir müavini qeyd edib ki, yaşıl enerji dəhlizləri ilə paralel fiberoptik kabelin çəkilməsi təkcə enerji ötürülməsi baxımından deyil, rəqəmsal infrastrukturun genişlənməsi üçün də mühüm addımdır.

“Hazırda ölkədə bir neçə data mərkəzi fəaliyyət göstərir və biz artıq yenilərinin inşası üzərində işləyirik. İnkişaf etdirdiyimiz yeni rəqəmsal dəhlizlər bu prosesi sürətləndirəcək”, – deyə Samir Məmmədov vurğulayıb.

Nazir müavini çıxışında əlavə edib ki, rəqəmsal dəhliz anlayışı yalnız texniki keçid nöqtəsi deyil, regional əməkdaşlıq və iqtisadi inteqrasiya baxımından da böyük əhəmiyyət daşıyır.

“Fiberoptik infrastrukturun yaşıl dəhlizlər üzərində qurulması, eyni zamanda ‘Rəqəmsal Dairə’ (Digital Circle) adlı təşəbbüs vasitəsilə Qara dəniz bölgəsi ilə bağlantı yaradır. Bu isə sərhədlərarası e-ticarət, startaplar, frilanser bazarı və rəqəmsal xidmətlər üçün yeni imkanlar deməkdir”, – deyə o bildirib.