TƏHLÜKƏSİZLİK

Məlumat verdiyimiz kimi, bu gün Palmalai Şirkətlər Qrupunun prezidenti Mübariz Mənsimovun müsahibəsini dərc etmiş bir neçə sayt (Afn.az. Bakupost.az, Qafqazinfo.az, Yenicag.az) dünəndən haker hücumlarına məruz qaldıqlarını bəyan ediblər.

Belə ki, onlar iddia edir ki, bu, SOCAR-ın məşhur haker qrupunun işidir.

Məsələ ilə bağlı Azərbaycan İnternet Forumunun Prezidenti, eskpert  Osman Gündüz  Xeberler.az-a bildirib ki, bir neçə internet resursun fəaliyyətinin eyni anda əngəllənməsi təsadüf ola bilməz.

O vurğulayıb ki, İnternet media qurumların fəaliyyətinə hər hansı qanunsuz müdaxilə yolverilməzdir.

Osman Gündüz onu da əlavə edib ki,  ölkədə qeyri-dövlət sektorunda informasiya təhlükəsizliyi ilə məşğul olan NRYTN-nin Elektron Təhlükəsizlik Mərkəzi (CERT.az) var:

“Son zamanlarda bu quruma internet resursların qanuni əsaslarla, hətta məhkəmənin qərarı olmadan belə bloklanması səlahiyyəti də verilib.  Düşünürəm ki, adı çəkilən internet media qurumunun rəhbərləri problemin araşdırılması üçün Elektron Təhlükəszilik Mərkəzinə müraciət etməsi doğru olardı”.

Qeyd edək ki, CERT-in vəzifələri ölkədə ümumi kibertəhlükəsizlik vəziyyətini mütəmadi təhlil etmək, kibertəhlükəsizlik sahəsində ölkədə fəaliyyət göstərən informasiya infrastrukturunun subyektlərinin fəaliyyətini əlaqələndirməkdir. Həmçin,  ölkə ərazisinə qanunsuz televiziya və radio yayımlarının, eləcə də mövcud televiziya və radio yayımlarına, peyk sistemlərinin fəaliyyətinə maneə törədən siqnalların müəyyən olunması ilə bağlı daxil olan müraciətləri araşdırmaq və müvafiq tədbirlər görməldir.

Bununla yanaşı, qurum  kibertəhlükəsizlik sahəsində təhlükələrin müəyyənləşdirilməsi və onların qarşısının alınması, həmçinin baş vermiş qanun pozuntuları barədə aidiyyəti dövlət orqanlarına məlumat verməlidir.

Məltəm Talıbzadə