TƏHLÜKƏSİZLİK

Bu gün APA-da yayımlanan məlumatlara görə, özünü İŞİD terror təşkilatının haker qrupu kimi qələmə verən Team System Dz Nürgün Group şirkətlər qrupunun tərkibinə daxil olan bir sıra şirkətləri və Rəvan Sığorta ASC -nin internet resursunu hədəfə alıb.

Belə ki, şirkətlər qrupunun bir sıra müəssisələrinin internet saytlarında hakerlərin "I love the Caliphate State Islamic country" şüarı və təhdid dolu mətn yerləşdirilib. Bundan başqa, saytlarda Suriyada baş verənləri əks etdirən videoçarx yerləşdirilib. Bütün saytlarda yerləşdirilən mətn və video eynidir.

Haker qrupu Facebook səhifəsində hücuma məruz qalan şirkətlərin rəsmi internet səhifələrinin siyahısını açıqlayıb: www.nissan.az, www.kyoto.az, www.vegastar.az, www.revansigorta.az, www.dongfeng.az, www.dfmc.az, www.beyazsud.az, www.besscoffee.az, www.bess.az, www.airfresh.az.
İndiyədək də bu resurslar işləmir və fəaliyyətlərini bərpa etmək mümkün olmayıb.

Xeberler.az olaraq hadisənin baş  vermə səbəbi, bu hücumu törədənlərlə bağlı Azərbaycan İnternet Formunun prezidenti, ekspert Osman Gündüzlə söhbət etdik.

Osman Gündüz məlumatı təsdiqləyib və qeyd edib ki, həqiqətən də beynəlxalq miqyasda tanınan yerli şirkətlərimizə  hücum olub.

O,  həmin qrupun  dağıdılan  7-8 saytın adlarının artıq bəlli olduğunu və  bu hadisənin milli internet resurslarımız  üçün çox ciddi  təhlükə olduğunu vurğulayıb:

Hadisəni törədənlərə  gəlincə isə ekspert hesab edir ki, indiki məqamda bu yalnız şirkət rəhbərliyi və hüquq-mühafizə orqanları ilə birlikdə araşdırıla və dəqiqləşdirilə bilər:

“Saytların hansı qurum tərəfindən dağıdılması yalnız araşdıma ilə müəyyən edilə bilər. Ola bilər ki, həmin qrup  özlərini şübhəli  göstərmək üçün İŞİD adından istifadə edib. Şirkət rəhbərliyi və hüquq -mühafizə orqanları araşdıra  bilər ki, hücum hansı ünvandan, hansı serverdən, hansı ölkədən olunub ”. AİF rəhbəri baş verənlərlə bağlı hüquq-mühafizə orqanlarına da müraciət etməyin vacib olduğunu diqqətə çatdırıb.

Ekspert vurğulayıb ki, bu, normal hadisə deyil. Bunun üçün də şirkətlər bu məsələdə daha diqqətli olmalıdır:

“Qlobal aləmdə tanınan Azərbaycanın milli resurslarına eyni anda bu cür hücum ciddi problemdir. Belə hallarla tez-tez rastlaşırıq. Ona görə də şirkətlər bu məsələdə daha diqqətli olub, monitorinq aparmalı  və yeni təhlükəsizlik xidmətləri təqdim etməldir”.

Osman Gündüz  həmçinin qeyd edib ki, Azərbaycanda qeyri-dövlət sektorunun internet resurslarının təhlükəsizliyinə nəzarət edən Elektron Təhlükəsizlik Mərkəzi fəaliyyət göstərir və  bu kimi məsələlərə diqqət etməlidir.

Ekspert hesab edir ki, bu hücumla bağlı  Mərkəz açıqlama verməyib. Onun sözlərinə görə, görünür, araşdırma da aparmayıblar.

Ekspert belə hücumlardan qorunmaq, profilaktiki tədbirlər görmək üçün Elektron Təhlükəsizlik Mərkəzi internet resurs sahibləri ilə birgə zəruri tədbirlər görməlidirlər.

Rəvan Sığorta ASC Nurgün şirkətlər qrupunun tabeliyində fəaliyyət göstərir.

Məltəm Talıbzadə