TƏHLÜKƏSİZLİK

Xüsusi Rabitə və İnformasiya Təhlükəsizliyi Dövlət Xidməti (XRİTDX) kiberinsidentləri mütəmadi araşdırır. Bu kiberinsidentləri araşdırılması zamanı sadəcə onun zərərsizləşdirilməsi və bloklanması ilə bağlı fəaliyyət göstərmirik. Eyni zamanda, belə kiberqruplaşmaları zərərsizləşdirərkən əldə etdiyimiz məlumatları müvafiq digər beynəlxalq təşkilatlarla, eləcə də daxildə Dövlət Təhlükəsizlik Xidməti ilə bölüşürük.

Xeberler.az məlumat verir ki, bunu Xüsusi Rabitə və İnformasiya Təhlükəsizliyi Dövlət Xidmətinin (XRİTDX) İdarə rəisi Tural Məmmədov bildirib.

Onun sözlərinə görə, yeni hədəflər və ya yeni qurbanlar olmasın deyə təhlükəsizlik vendorlarıyla məlumat bölüşürük.

“Eyni zamanda da bu tip kütləvi hədəflər olduqda, bununla bağlı həm üzv olduğumuz beynəlxalq təşkilatlarda, həm əməkdaşlıq etdiyimiz dövlətlərin CERT mərkəzləri ilə məlumatları bölüşürük. Eləcə də, belə cinayətkar qrupları zərərsizləşdirmək istiqamətində fəaliyyət göstəririk. Artıq növbəti dəfə biz qruplaşmanın izinə düşüb onların məlumatlarını ələ keçirməyə müvəffəq olduq və 135 ölkədə fəaliyyəti olan böyük bir cinayətkar şəbəkəni ifşa etdik”, - deyə T.Məmmədov qeyd edib.

Azərbaycanın son illərdə kibertəhlükəsizlik sahəsində irəliyə doğru vacib addımlar atdığını qeyd edən T.Məmmədov artıq xanımların da informasiya texnologiyaları və kibertəhlükəsizlik sahəsinə marağının olduğunu diqqətə çatdırıb: “Bildiyiniz kimi, qadınların informasiya texnologiyaları (İT) sahəsində çalışması və layihələrinin inkişaf etdirilməsi istiqamətində ölkəmizdə geniş işlər görülür. Bu istiqamətdə “Femmes Digitales” İB də fəaliyyətini xüsusi vurğulamaq lazımdır. Mən artıq iki ildir ki, bu tədbirin münsiflər heyətində çıxış edirəm. Daxil olan CV-lərdən, forumlardan da görürəm ki, həqiqətən qadınların informasiya texnologiyaları sahəsinə böyük maraqları var”, - deyə T.Məmmədov əlavə edib. (Azərtac)