İNNOVASİYA VƏ STARTAP

İqtisadi İslahatların Təhlili və Kommunikasiya Mərkəzinin operatoru olduğu “Enterprise Azerbaijan” portalının “Startup School 3” layihəsi çərçivəsində həyata keçirilən “Yaşıl və Rəqəmsal İpək Yolu” (Green and Digital Silk Road) beynəlxalq akselerasiya proqramı finala yaxınlaşır. Proqramın ən mühüm mərhələlərindən olan “Demo Day” üçün münsiflər heyəti müəyyən olunub.

Xeberler.az bildirir ki, 21 noyabr 2025-ci il tarixində Azərbaycan İnnovasiya Mərkəzində keçiriləcək tədbirdə Azərbaycan, Malta, ABŞ və Türkiyənin innovasiya ekosistemlərini təmsil edən vençur fondlarından ekspertlər münsiflər heyətində təmsil olunacaqlar. Vençur fondların qiymətləndirmə prosesində iştirakı startapların qlobal bazara inteqrasiyasına və investisiya qazanmaq potensialına müsbət təsir edəcək.

Münsiflər heyətinin üzvləri aşağıdakı kimidir:

1. Camal Ağayev – İnnovasiya və Rəqəmsal İnkişaf Agentliyi (Azərbaycan)
2. Samir Hacıbəyli – “Caucasus Ventures” (Azərbaycan)
3. Murat Baday – “Synapses Ventures” (ABŞ)
4. Gonca Kara – “A8 Acceleration Center” (Malta)
5. Turan Özbahçeci – “Ozbahceci Invest Club” (Türkiyə)
6. Orxan Abbasov – SABAH.HUB (Azərbaycan)
7. Telman Mustafayev – “Yeni Fikir” (Azərbaycan)

Tədbirin birinci hissəsi - “Startapların sərgisi” mərhələsində komandalar öz startapları üzrə məhsul və ya həlləri təqdim edəcək, münsiflər heyəti isə bu layihələri təsdiq edilmiş meyarlar (innovativlik, bazar potensialı, komanda bacarıqları və MVP) əsasında qiymətləndirəcəklər. Bu mərhələnin nəticəsi olaraq yalnız ən perspektivli layihələr “pitch” mərhələsinə vəsiqə qazanacaq.

Final mərhələsinin əsas hissəsi olan “Pitch” zamanı seçilmiş startaplar öz layihələrini münsiflər qarşısında təqdim edəcək, hər bir layihənin inkişaf perspektivləri, investisiya cəlbetmə imkanları və kommersiyalaşdırma potensialı müzakirə olunacaq. Qiymətləndirmə yekunlarına əsasən ən yaxşı üç layihə qalib elan edilərək mükafatlandırılacaqlar.

“Startup School 3” layihəsi və onun tərkib hissəsi olan “Yaşıl və Rəqəmsal İpək Yolu” beynəlxalq akselerasiya proqramı Azərbaycanın innovasiya ekosisteminin inkişafına, startapların beynəlxalq bazarlara çıxışına və qlobal tərəfdaşlıqların genişlənməsinə mühüm töhfə verir. Proqram çərçivəsində 100-dən çox startap komandası beynəlxalq təlimçi və mentorların iştirakı ilə hazırlıq mərhələlərindən keçərək öz layihələrini təkmilləşdirib.