TƏDBİRLƏR

Yanvarın 16-da Dövlət Gömrük Komitəsinin Akademiyasında süni intellekt əsaslı kibertəhlükəsizlik tətbiq laboratoriyasının açılışı olub.

Xeberler.az bildirir ki, Dövlət Gömrük Komitəsinin Akademiyasında (DGKA) Türkiyənin “Crypttech” Kripto şirkəti ilə əməkdaşlığı çərçivəsində qurulan laboratoriyanın açılışında Dövlət Gömrük Komitəsinin sədrinin müavini, gömrük xidməti general-mayoru Natiq Şirinov, Dövlət Gömrük Komitəsinin Akademiyasının rəisi, gömrük xidməti general-mayoru Qulu Novruzov, “Crypttech” Kripto şirkətinin qurucusu və baş direktoru Alper Cem Yılmaz, İnnovasiya və Rəqəmsal İnkişaf Agentliyinin sədri Fərid Osmanov, Akademiyanın əməkdaşları, dövlət və özəl qurumların, eləcə də bir neçə ali təhsil müəssisələrinin nümayəndələri iştirak edib.

Tədbirdə çıxış edənlər Dövlət Gömrük Komitəsinin rəqəmsallaşma və innovativ texnologiyaların tətbiqi istiqamətində həyata keçirdiyi layihələrdən, o cümlədən informasiya və kibertəhlükəsizlik, süni intellekt texnologiyalarının tətbiqinin əhəmiyyətindən bəhs ediblər. Bildirilib ki, Akademiyada yaradılan sayca üçüncü kibertəhlükəsizlik laboratoriyası, elmi-tədqiqat işlərinin aparılması, süni intellekt əsaslı texnologiyaların öyrədilməsi üçün nəzərdə tutulub.

Tədbirdə Akademiyanın və “Crypttech” Kripto şirkətinin fəaliyyətinə dair təqdimatlar da nümayiş olunub.

Daha sonra Dövlət Gömrük Komitəsinin Akademiyası ilə Türkiyənin “Crypttech” Kripto şirkəti arasında Anlaşma Memorandumu imzalanıb.

Yekunda qonaqlar Dövlət Gömrük Komitəsinin Akademiyasının inzibati binasında yeni istifadəyə verilən süni intellekt əsaslı kibertəhlükəsizlik tətbiq laboratoriyasının fəaliyyəti ilə yaxından tanış olublar.