İNNOVASİYA VƏ STARTAP

Startap Günləri 2015-in qalibi Musicbeez.com sosial şəbəkəsində növbəti layihə başlayıb.

Qeyd edək ki, bu layihə musiqi dinləyicilərinə sevdikləri mahnını digər məşhur müğənninin ifasında eşitmək imkanı yaradır.

Musicbeez komandasından Xeberler.az-a verilən məlumata görə, platformanın budəfəki iştirakçısı Azərbaycanın əməkdar artisti Tünzalə Ağayevadır.

Dinləyicilərə Tünzalə Ağayeva tərəfindən seçilmiş və səsvermədən sonra müğənninin öz üslubunda ifa olunacaq üç mahnıdan birinə səs vermək imkanı yaradılıb.

Səsverməyə  3 mahnı Elmira Rəhimova – "Sən yadıma düşəndə", Lara Fabian - "Adagio"  və Üzeyir Hacıbəyov – "Sevgili canan"  təqdim edilib.

 Nəticədə ən çox səs toplamış mahnı “Səs Azərbaycan” layihəsinin münsifi Tünzalə Ağayeva tərəfindən səsvermədə iştirak etmiş dinləyicilər üçün ifa olunacaq.

 Səsvermə bu gündən başlayıb, martın 25-ə kimi davam edəcək.

Tünzalə Ağayeva bu  startap layihəsi ilə bağlı  bildiririb ki, Musicbeez çox maraqlı və həm də çox faydalı bir layihədir:

“Maraqlı ona görə ki, insanlar tanıdıqları məşhurları Musicbeez-in köməyi ilə fərqli repertuarda görə biləcəklər və ən əsası onlar müğənninin repertuarına bilavasitə təsir edə bilcəklər. Və əlbətdə ki faydalıdır ona görə ki, Musicbeez həmin sənətçinin repertuarına məcburi yeni mahnılar əlavə edir. Bu layihə müğənnini öz ənənəvi tərzindən bir qədər ayıraraq onu yeni axtarışlara sövq edir, və nəticədə həqiqətən yenilik ortaya çıxır. Mən Musicbeez layihəsini və onun komandasına bir musiqiçi kimi təşəkkürümü bildirirəm ki, belə bir ideyanın arxasınca düşüblər, onu reallaşdırmağa çalışırlar. İnanıram ki, layihə çox keyfiyyətli olacaq və əksər sənət insanları da bu layihəyə böyük məmnuniyyətlə qoşulacaq”.

Xatırladaq ki, Tünzalə Ağayevanın iştirakı ilə baş tutan bu layihə Musicbeez-də artıq ikinci layihədir.

Birinci layihə Azərbaycanı Eurovision 2014 mahnı müsabiqəsində təmsil etmiş Dilarə Kazımovanın iştirakı ilə baş tutub. O , layihədə qalib olmuş Adele – "Hello" mahnısı müğənni tərəfindən təqdimata hazırlıq mərhələsindədir.

Bu növ layihələrin digər Azərbaycan və əcnəbi müğənnilərin iştirakı ilə də baş tutacağı gözlənilir. Layihələrdə aktiv iştirak edən və öz dostlarını iştiraka cəlb edən istifadəçilər Musicbeez tərəfindən xüsusi mükafatlarla mükafatlandırılacaq.

Qeyd edək ki,  dinləyicilər hər-hansı digər mahnını Tünzalə Ağayevanın ifasında eşitmək istəyirlərsə, Musicbeez-də mahnının və orijinal müğənninin adını qeyd edərək Tünzalə Ağayevaya öz istəklərini ünvanlaya bilər.

Saytda qeydiyyatdan keçmiş Tünzalə Ağayeva ona ünvanlanmış və saytın istifadəçiləri tərəfindən kifayət qədər dəstək toplamış istəkləri yerinə yetirməyə çalışacaq.

Musicbeez dinləyicilərə istədikləri mahnını sevdikləri müğənninin ifasında eşitmək üçün unikal imkan yaradan sosial şəbəkədir. Musicbeez.com saytında dinləyicilər hansı mahnını hansı müğənninin ifasında eşitmək istədiklərini bildirə bilir, və platformanın bütün dünyadan olan digər istifadəçiləri həmin istəyi görərək ona qoşula bilirlər.

Saytda qeydiyyatdan keçmiş müğənni ona ünvanlanmış istəkləri izləyə bilir və kifayət qədər səs toplamış mahnını ifa edərək dinləyicilərin istəyini yerinə yetirir. Beləliklə, Musicbeez ilk dəfə olaraq dinləyicilərə mahnıların yaranmasında aktiv iştirak etmək və istədikləri mahnını məhz özlərinin seçdikləri müğənninin ifasında eşitmək imkanı yaradır.

Bununla Musicbeez musiqi dinləyicisini onun hazırki passiv mövqeyindən çıxararaq, musiqi sənayesinin akiv iştirakçısına çevirir. Şəbəkənin yaradıcıları əmindirlər ki, dinləyicilərin yaradıcı prosesə cəlb edilməsi daha çox uğurlu musiqi layihələrinin ərsəyə gəlməsinə səbəb olacaqdır. Bundan başqa, Musicbeez istedadlı və yüksək musiqi zövqünə malik dinləyicilərin aşkarlanmasına və onların dünya musiqi sənayesinə cəlb olunmasına şərait yaradacaq.

Məltəm Talıbzadə