TƏDBİRLƏR

Azərbaycan Respublikasının Baş naziri Artur Rasi-zadə  regional biznes-forumun işində iştirak etmək üçün ölkəmizə səfərə gələn Türkiyə Cümhuriyyəti Baş nazirinin müavini Əli Babacanı qəbul edib.
 
Nazirlikdən Xəbərlər-ə verilən məlumata görə, qəbul zamanı Türkiyə ilə Azərbaycanın tarixən sıx əlaqələrə malik olmasından söz açan Baş nazir Artur Rasi-zadə ənənəvi doğma münasibətlərimizin  müasir dövrdə daha da inkişaf edərək strateji tərəfdaşlıq səviyyəsinə yüksəldiyini qeyd edib. Daha sonra qarşılıqlı faydalı əsaslarda  siyasi, iqtisadi, mədəni bağların daha da möhkəmləndirilməsinin zəruriliyini vurğulayan Baş nazir nəqliyyat, rabitə, telekommunikasiya, enerji, ticarət  və digər sahələrdə işbirliyimizin çox böyük səmərəli nəticələr verdiyinə diqqət yönəldib.
 
Öz növbəsində Əli Babacan Türkiyə ilə Azərbaycanın stabil və etibarlı əməkdaşlıq bağlarının mövcudluğunu vurğulayıb. 
 
O, müxtəlif istiqamətlər üzrə sıx əməkdaşlığımızın perspektivinə toxunaraq bildirib ki, gələcəkdə də bir-birimizə hərtərəfli dəstək baxımından qarşıda çox böyük imkanlar vardır. 
 
Sonra Əli Babacan G-20 platforması çərçivəsində Bakıda keçirilən regional biznes-forumda müzakirə ediləcək məsələlər barədə Baş nazirə ətraflı məlumat verib.
 
Görüşdə qarşılıqlı maraq doğuran bir sıra digər məsələlər ətrafında da fikir mübadiləsi aparılıb.

Xeberler.az