AzInTelecom MMC-nin dəstəyi və Azərbaycan Texniki Universitetinin (AzTU) İnkubasiya Mərkəzinin təşkilatçılığı ilə keçiriləcək SmartSolutions Hackathon 2026 tədbirinə hazırlıq işləri son mərhələyə çatıb.
Xeberler.az bildirir ki, Hackathon 10–11 aprel 2026-cı il tarixlərində baş tutacaq və tədbirin rəsmi açılışı 10 aprel saat 14:00-da keçiriləcək.
Artıq hackathonda iştirak edəcək komandalar müəyyən olunub. Seçim nəticələrinə əsasən, hər iki istiqamət üzrə ümumilikdə 14 komanda iştirak hüququ qazanıb:
Süni İntellekt və Mobillik istiqaməti üzrə – 7 komanda
FinTech, Kibertəhlükəsizlik və Bulud texnologiyaları istiqaməti üzrə – 7 komanda
Komandalar Azərbaycan Texniki Universiteti (AzTU) və Türkiyə-Azərbaycan Universitetinin (TAU) tələbələrindən formalaşdırılıb.
Hazırda seçilmiş komandalar üçün bütün zəruri məlumatlar, o cümlədən hackathonun qaydaları və agenda iştirakçılarla paylaşılıb. Komandalar hackathon çərçivəsində işləyəcəkləri problemləri isə tədbirin açılış günü, təqdim olunacaq mövzular arasından yerində seçəcəklər.
Hackathon çərçivəsində hər iki istiqamət üzrə qalib komandalar üçün pul mükafatları nəzərdə tutulub:
1-ci yer – 1000 AZN
2-ci yer – 700 AZN
3-cü yer – 500 AZN
SmartSolutions Hackathon 2026 çərçivəsində iştirakçılar real problemlər üzərində işləyərək innovativ həllər hazırlayacaq, mentor dəstəyi ilə ideyalarını minimum məhsul (MVP) səviyyəsinə çatdırmaq imkanı əldə edəcəklər.
