KOSMOS

Türkiyə Nəqliyyat, Gəmiçilik və Rabitə Nazirliyi Milli Kosmik Agentliyinin yaradılması haqqında qanun layihəsi üzərində işin başa çatdırılmasını bəyan edib.

RYTN-dən Xeberler.az-a verilən məlumata görə,  Nazir Əhməd Arslan Anadolu agentliyinə müsahibədə bildirib ki, sənəd gələn il parlamentə müzakirə və təsdiq üçün təqdim ediləcək.

"Biz hesab edirik ki, Türkiyə Kosmik Agentliyinin yaradılması sayəsində güclü texnoloji irəliləyiş etmək mümkün olacaq", - nazir qeyd edib.

RYTN-dən Xeberler.az-a verilən məlumata görə,  o, həmçinin əlavə edib ki, agentlik çərçivəsində profilli nazirlərin daxil olacağı kosmik sahədə strategiyalar üzrə Ali Şura yaradılacaq. Yeni strukturun qanun layihəsinin və nizamnaməsinin hazırlanmasında NASA və digər kosmik agentliklərin analoji sənədlərindən istifadə olunub.

Nazir vurğulayıb ki, artıq Almaniya və Yaponiyanın kosmik agentlikləri ilə əməkdaşlığa başlanılıb. Yaponiya ilə Beynəlxalq Kosmik Stansiyada bir sıra birgə təcrübə və eksperimentlərin keçirilməsi barədə protokol imzalanıb. "Biz, həmçinin Yaponiya ilə birlikdə 2017-ci ilin əvvəlində Yerətrafı orbitə sınaq peykini göndərməyi planlaşdırırıq", - Ə.Arslan deyib.

2014-cü ildə Konya əyalətində Türkiyə kosmik bazasının tikintisi başa çatıb. Burada peyklərin istehsalı və sınaqları üçün avadanlıqlar yerləşir. Baza eyni anda bir neçə kosmik aparatda avadanlığın quraşdırılması ilə məşğul olmağa, müxtəlif sistemləri inteqrasiya etməyə, aparatların kosmosa göndərilməsi üçün sınaqların və  start meydançalarına aparılmasına hazırlıqların keçirilməsinə imkan verir.

Hazırda ölkə Yerətrafı orbitdə altı telekommunikasiya peykinə, Yer səthinin müşahidəsi və fotoşəkilinin çəkilməsi peykinə, eləcə də kəşfiyyat peykinə malikdir. Respublika daha iki telekommunikasiya peyki hazırlayır və perspektivdə orbitdə iştirakını artırmaq niyyətindədir.

Xeberler.az