Yeni proqram smartfonu zəlzələ detektoruna çevirir

16-02-2016 / 13:14

Seysmoloq-alimlər və mobil proqram istehsalçıları smartfonu şəxsi zəlzələ detektoruna çevirən proqram hazırlayıblar.

Xeberler.az ict.az-a istinadən məlumat verir ki, Android əməliyyat sistemi üçün hazırlanmış MyShake proqramı smartfonun akselerometri vasitəsilə yaxınlıqda baş verən seysmik hadisələri təhlil edərək real vaxt rejimində zəlzələnin maqnitudunu qiymətləndirir, əldə olunan məlumatları isə seysmoloqların analiz etməsi üçün mərkəzi məlumat bazasına göndərir.

Alimlərin fikrincə, gələcəkdə bu proqram inkişaf etmiş istifadəçi şəbəkəsinin köməyilə erkən xəbərdarlıq sistemi kimi də istifadə edilə bilər.

Məlum olduğu kimi, dünya üzrə yayılan seysmik şəbəkələr zəlzələləri aşkar edərək əldə olunan məlumatları alimlərə ötürür. Bu da öz növbəsində alimlərə Yer kürəsində daim baş verən geoloji proseslər nəticəsində yaranan seysmik təkanların qlobal təsvirini yaratmağa köməklik edir. Lakin seysmik şəbəkənin sıx olmadığı rayonlarda baş verən seysmik hadisələrin izlənərək qeydə alınmasında çətinlik yaranır. Layihənin rəhbəri, Kaliforniyanın Berkli seysmoloji laboratoriyasının direktoru Riçard Allenin sözlərinə görə, bu boşluqları öz smartfonları ilə “mülki alimlər” doldura bilərlər.

Sözügedən proqram smartfonun akselerometrinin köməyilə zəlzələ dalğalarını gündəlik həyatda baş verən digər titrəyişlərdən fərqləndirmək bacarığına malikdir. MyShake zəlzələni aşkar etdiyi zaman dərhal emal mərkəzinə həyəcan siqnalı göndərir.

Hazırda proqramın imkanları yalnız seysmik məlumatları toplamaq və mərkəzi serverə ötürməklə məhdudlaşır. Proqramın növbəti versiyalarında isə zəlzələ haqqında xəbərdarlığın istifadəçilərə göndərilməsi nəzərdə tutulur.

Xeberler.az

 


ŞƏRHLƏR





sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.