E-TİCARƏT

Azərbaycan və Qazaxıstan arasında ticarət və rəqəmsal iqtisadiyyat sahəsində əməkdaşlığın gücləndirilməsi məqsədilə İqtisadi İslahatların Təhlili və Kommunikasiya Mərkəzinin (İİTKM) “Azexport.az” portalı və Qazaxıstan Respublikasının “QazTrade” Ticarət Siyasətinin İnkişafı Mərkəzi arasında Anlaşma Memorandumu imzalanıb.

Xeberler.az bildirir ki, sənədin məqsədi iki ölkə arasında ticarət və iqtisadi əlaqələrin inkişaf etdirilməsi, elektron ticarət və rəqəmsal iqtisadiyyat sahəsində birgə layihələrin həyata keçirilməsi, ixrac potensialının artırılması, həmçinin Azərbaycan və Qazaxıstan məhsullarının qarşılıqlı şəkildə rəqəmsal ticarət platformalarına çıxışının təmin edilməsidir.

Memorandum çərçivəsində tərəflər ticarətin təşviqi, rəqəmsal ticarətin inkişafı, ixracı
dəstəkləyən tənzimləmələr və normativ baza üzrə məlumat mübadiləsi, eləcə də ortaq təşəbbüslərin reallaşdırılması barədə razılığa gəliblər.

“QazTrade” təşkilatının ixracın inkişafı üzrə direktoru Aynur Amirbekova bildirib ki, imzalanan sənəd iki ölkənin rəqəmsal ticarət sahəsində əməkdaşlığını yeni mərhələyə daşıyacaq: “Azərbaycan və Qazaxıstan iqtisadiyyatları bir-birini tamamlayan strukturlara malikdir. Bu əməkdaşlıq həm “QazTrade”, həm də “Azexport” üçün təcrübə və bilik mübadiləsi baxımından böyük imkanlar açır. Rəqəmsal ticarətin inkişafı sahəsində ortaq təşəbbüslər regionda bizneslərin rəqabət qabiliyyətini artıracaq və ixrac proseslərinin daha çevik şəkildə idarə olunmasına şərait yaradacaq.”

“Azexport.az” portalının rəhbəri Ayxan Qədəşov isə qeyd edib ki, bu sənəd iki ölkə arasında iqtisadi əməkdaşlığın rəqəmsal müstəvidə daha da genişlənməsi baxımından əhəmiyyətlidir: “QazTrade” ilə imzalanan Anlaşma Memorandumu Azərbaycanın və Qazaxıstanın ortaq maraqlarına əsaslanır. Məqsədimiz sahibkarların rəqəmsal bazarlara çıxışını asanlaşdırmaq, yeni elektron ticarət modelləri üzrə təcrübə mübadiləsini təşviq etmək və iki ölkə arasında qarşılıqlı faydalı əməkdaşlığı genişləndirməkdir. Biz inanırıq ki, bu tərəfdaşlıq həm dövlət qurumları, həm də biznes icmaları üçün real nəticələr doğuracaq”.

Memorandum çərçivəsində tərəflər birgə rəqəmsal sərgi və ticarət platformalarının yaradılması, ortaq ixrac təşviqi tədbirlərinin təşkili, startap ekosisteminin inkişafı, eləcə də rəqəmsal iqtisadiyyat üzrə təlim və seminarların keçirilməsi istiqamətlərində əməkdaşlıq etməyi planlaşdırırlar.

Qeyd edək ki, “Azexport.az” portalı həmçinin “Avrasiya Françayzinq Forumu – Bakı 2025” tədbirinin tərəfdaşlarından biridir. Forum çərçivəsində portalın rəhbəri Ayxan Qədəşov spiker qismində çıxış edərək elektron ticarət həlləri, rəqəmsal sərgi zalının fəaliyyəti və regional əməkdaşlıq imkanları barədə iştirakçılara məlumat verib.