PROQRAMLAR

Azərbaycan Respublikasının Elm və Təhsil Nazirliyinin dəstəyi ilə Azərbaycan Kibertəhlükəsizlik Təşkilatları Assosiasiyası (AKTA) tərəfindən icra olunan “İnformasiya təhlükəsizliyi ixtisası üzrə elmi-metodiki tədris vəsaitlərinin hazırlanması” layihəsi çərçivəsində yekun hesabat xarakterli “Kiber Təhsil Konfransı” baş tutub. 

Xeberler.az bildirir ki, Bakı Ali Neft Məktəbində keçirilən konfransda layihə çərçivəsində hazırlanmış tədris vəsaitlərinin akademiya və biznes icmasına təqdimatı reallaşdırılıb. Konfransın əsas məqsədi kibertəhlükəsizlik ixtisasının aktual məsələlərini müzakirə etmək və gələcək perspektivləri barədə fikir mübadiləsi aparmaq olub. Müzakirələrdə universitet nümayəndələri ilə yanaşı dövlət və özəl qurumların məsul nümayəndələri maraqlı fikirlər səsləndiriblər. 

Konfransı giriş sözü ilə AKTA-nın icraçı direktoru Rauf Cabarov açıb. Daha sonra Mingəçevir Dövlət Universitetinin rektoru Anar Eminov kibertəhlükəsizlik ixtisası barədə fikirlərini səsləndirib. AKTA-nın eksperti və layihə rəhbəri olan Təbriz Cəfərov layihə çərçivəsində görülmüş işlər barədə məruzə ilə çıxış edib.  

Konfransın panel çıxışlarında iki maraqlı mövzu haqqında müzakirələr aparılıb. Paneldə iştirak edən Milli Kibertəhlükəsizlik Mərkəzinin məsul nümayəndəsi Elvin Balacanov, Azərbaycan Mühəndislər Universitetinin dekanı Vaqif Qasımov və Azərbaycan Texniki Universitetinin kafedra müdiri Yadigar İmamverdiyev informasiya təhlükəsizliyi ixtisasının gələcək perspektivləri barədə məruzələr ilə çıxış edib, auditoriyanın suallarını cavablandırıblar. Sonuncu paneldə günümüzün aktual mövzusu olan süni intellekt və kibertəhülkəsizlik məsələləri müzakirə edilib. 

Sonuncu panelin moderatoru AKTA-nın süni intellekt üzrə eksperti, Alas Akademiyasının təsisçisi Elşad Yusifli olub. Paneldə Megasec şirkətinin nümayəndəsi Arzu Rəhimli və süni intellekt eksperti, ProximaTech şirkətinin mühəndisi Qasım Vəliyev çıxış ediblər. Müzakirələrdə gələcəyin süni intellektə əsaslanan işçi qüvvəsinin hazırlanması və süni intellektin texnologiyaların inkişafına təsiri təhlil edilib.

Yusifli paneli açarkən süni intellektin təhsili necə dəyişəcəyi və gələcəkdə iş mühitinin necə transformasiya olunacağı haqqında danışıb. Milli təhsil infrastrukturlarının rəqəmsallaşdırılmasında iştirak etmiş bir mütəxəssis kimi, süni intellektin bu sistemlərə inteqrasiyası və gələcək nəsil mütəxəssislərin hazırlanması istiqamətində konkret təkliflər irəli sürüb.

Qeyd edək ki, “Kiber Təhsil Konfransı” Azərbaycan Respublikasının Elm və Təhsil Nazirliyi tərəfindən 2024-cü ildə elan edilmiş “Təhsildə könüllü fəaliyyətin təşkili” qrant müsabiqəsinin qalibi olan “İnformasiya təhlükəsizliyi ixtisası üzrə elmi-metodiki tədris vəsaitlərinin hazırlanması” layihəsi çərçivəsində həyata keçirilib. Layihə universitetlərdə “informasiya təhlükəsizliyi” ixtisasının tədris kontentinin inkişafına yönəlib. AKTA-nın son illərdə həyata keçirdiyi ardıcıl layihələr sayəsində qeyd olunan ixtisas üzrə artıq 6 tədris vəsaiti hazırlanıb və akademik ictimaiətə təqdim olunub.