TENDER

Barselonada CineEurope Avropa sərgisində (Barcelona International Convention Centre) kino texnologiyaları üzrə aparıcı CJ 4DPLEX şirkəti və “CinemaPlus” kinoteatrlar şəbəkəsi arasında “Dəniz Mall” ticarət mərkəzində yeni 4DX formatlı texnologiyanın quraşdırılmasına dair müqavilə imzalanıb.

Xeberler.az bildirir ki, Azərbaycan dünyada bu texnologiyanı quraşdırmış sayca 65-ci, MDB-də isə Rusiya, Ukrayna və Belarusdan sonra 4-cü ölkədir. 

CJ 4DPLEX baş ofisi Seulda olmaqla yanaşı, Los-Anceles və Pekində ofisləri olan gələcək nəsil aparıcı texnologiyadır.

CJ 4DPLEX-in baş direktoru Yonq Ryul Kim 4DX-in Azərbaycanda işə düşməsinə dair “CinemaPlus” ilə müqavilə imzalanmasından məmnunluğunu bildirib: "Biz kino strukturunda inqilabi dəyişikliklər olunması üzərində bu cür yaxşı partnyor ilə işlər aparmaqdan çox xoşbəxtik və ümid edirik ki, yaxın illərdə onlar ilə uzunmüddətli əməkdaşlıq quracağıq".

“CinemaPlus”un baş direktoru Cəfər Axundzadə bildirib ki, əsas məqsəd istirahət və insanların sevincidir: "Ümid edirik ki, dostların dəstəyi və əməkdaşlığın möhkəmlənməsi ilə biz hər növbəti günü rəngarəng edə biləcəyik! Ümumiyyətlə, başqa ölkələrdə olduğu kimi, yerli auditoriyamız innovasiyaları, texnoloji təkminləşmələri və yeni növ əyləncələri böyük şövq ilə qarşılayır. Bizim sorğumuz onu göstərdi ki, 4DX-in işə düşəcəyi təqdirdə, tamaşaçılar kinoteatra böyük həvəslə gələcək və istirahətdən parlaq xatirələr əldə edəcəklər. Çünki hər kəs özünü kinonun bir hissəsi kimi hiss etmək istəyir. 4DX-in işə düşməsi bu sahəyə marağı artıracaq və müvafiq olaraq gəlirlərin artmasına gətirib çıxaracaq”.

Qeyd edək ki, 4DX innovativ kinoteatr texnologiyası kəskin süjetli blokbasterləri və qorxu filmlərini hərəkət, fırlanma və kreslodan titrəyişlər, su damcıları və külək, ildırım və qar, sabun köpükləri və ətir kimi əlavə xüsusi effektlər ilə vizual effektlərini genişləndirir. Bunun nəticəsində 4DX tamaşaçıları böyük ekranda baş verən hadisələrə sövq etməklə kino sənayesində ən valehedici formatlardan biri hesab olunur.

Hər bir 4DX zalı məkanda video ilə sinxron olaraq 21 müxtəlif effekt ilə hərəkət edən və filmin nümayişindən maksimal həzz almaq imkanı verən oturacaq yerlərindən ibarətdir. 650-dən çox Hollivud və yerli film 4DX formatında nümayiş olunub. Bu günə qədər dünyanın 65 ölkəsində 649 zalında 75 000 4DX var.

“Dəniz Mall” Bakı şəhərində, Xəzər dənizinin sahilində yerləşir. Ticarət mərkəzinin açılışı 2019-cu ilin sonuna gözlənilir. Ticarət mərkəzinin qeyri-adi dizaynı Azərbaycan gerbinin səkkizgüşəli ulduzundan ilhamlanmış londonlu dizayner Çapman Teylor tərəfindən qurulub. “CinemaPlus” kinoteatrı 11 zaldan və 1165 oturacaq yerindən ibarətdir.