E - HÖKUMƏT

Açıq Hökumətin Təşviqinə dair Hökumət-Vətəndaş Cəmiyyəti Dialoqu Platforması ASAN İmza xidmətinin abunə haqqının artırılması ilə bağlı bəyanat verib.

Xeberler.az məlumat verir ki, ASAN İmza-nın operatoru Best Solutions MMC və üç mobil operator bu xidmət  üzrə aylıq abunə haqqının 2.5 dəfə artırıldığını açıqlayıblar.

Belə ki, 15.08.2018-ci il tarixindən etibarən Asan İmza xidmətindən istifadəyə görə əhali, sahibkarlıq fəaliyyəti ilə məşğul olan hüquqi və fiziki şəxslər, hüquqi şəxslərin nümayəndələri və dövlət hakimiyyəti və yerli özünüidarəetmə orqanları əməkdaşları olan abunəçilər üçün hər faktura dövrünə görə abunə haqqı ƏDV daxil 2.50 AZN məbləğində təyin edilib. Hazırda aylıq abunə haqqı 1 AZN təşkil edir.

Qeyd edək ki, aylıq abunə haqqının artırılmasını mobil operatorlar Asan İmza xidmətinin birbaşa təminatçısı Best Solutions MMC-nin təklifi ilə baş verdiyini açıqlayıblar. Best Solutions MMC isə bu təklifini xidmətin maya dəyərini təşkil edən zəruri xərclərin əhəmiyyətli artmasıyla izah edib.

Məlum olduğu kimi ASAN İmza dövlət layhəsidir. Bu xidmət Vergilər Nazirliyi və Vətəndaşlara Xidmət və Sosial İnnovasiyalar üzrə Dövlət Agentliyi Best Solutions şirkətinin mobil operatorlarla birgə əməkdaşlığı ilə yaradılıb.

Bu dövlət qurumları qiymət artımından məlumatsız və prosesdən xəbərsiz olduqlarını bildirblər. Buradan belə qənaətə gəlmək olur ki, kifayət qədər ictmai əhəmiyyət kəsb edən, kütləvi xarakterli bir xidmətin qiymətinin artırılması yalnız Best Solutions MMC-nin təkidi, mobil operatorların razılığı ilə həyata keçirilib.

Nəzərə almaq lazımdır ki, mobil ASAN imza xidməti ölkədə yalnız bir qurum tərəfindən təklif olunur. Bu sahədə rəqabət yoxdur. Məhz bu səbədən hər üç mobil operator da qiymətləri eyni anda qaldırdıqlarını bildiriblər.

Platforma bəyan edir ki, ASAN imza operatorunun qiymət artımı ilə bağlı irəli sürdüyü arqumentlərin heç bir əsası yoxdur. Bu xidmətlərin hazırlanması və istismarı üçün hökumət tərəfindən də xeyli vəsait ödənilib. İlkin dövrlərdə yalnız Azercell  şirkəti ilə birgə istifadəyə verilən xidmət üçün kifayət qədər yüksək abunə haqları müəyyən edilmiş və çəkilən xərclərin ödənilməsi üçün hökumət tərəfindən yetərli imkanlar yaradılıb.

Bildirək ki, Açıq Hökumətin Təşviqinə dair Hökumət-Vətəndaş Cəmiyyəti Dialoqu Platforması hesab edir ki, minlərlə hüquqi və fiziki şəxslərin mənafeyinə toxunan, dövlət layihəsi çərçivəsində yaradılan  bir ictimai xidmətin  haqqının kəskin artması ilə bağlı bu çür açıqlama yetərli ola bilməz. Bu cür qərarın verilməsinin bir cümlə izah edilməsinə cəhd göstərilməsi, ətraflı məlumat açıqlanmaması yolverilməzdir.

Mütəxəssislərin və ekspertlərin rəyləri də göstərir ki, artıq qurulmuş və işə salınmış bir platformada bu tip xidmətlərin göstərilməsi hər hansı əlavə xərclər yaratmır.

Platforma bəyan edir ki, əsassız formada qadırılan aylıq abunə haqları ölkədə elektron hökumət quruculuğunun, elektron xidmətlərin  inkişafına mənfi təsir göstərir, vətəndaşların elektron mühitə marağının azalmasına gətirib çıxarır.

Plaforma hesab edir ki, adı çəkilən xidmətin ictimai əhəmiyyət kəsb etməsi, hələlik bu sahədə rəqabətsiz mühitin mövcudluğunu, dövlət  layihəsi olması, minlərlə sahibkarın və dövlət qurumlarının bu imzadan istifadə etməsi nəzərə alınaraq, ASAN İmza xidmətlərindən istifadə ilə bağlı tariflər, digər məsələlər  hökumət tərəfindən müəyyən olunmalıdır.

Xeberler.az