E-TİCARƏT

Avropa İttifaqının təşəbbüsü ilə həyata keçirilən "EU4Digital" layihəsinin rəsmi internet səhifəsində “Azexport.az” internet portalının da iştirak etdiyi pilot layihə barədə məqalə dərc olunub.

Xeberler.az-ın məlumatına görə, portalının rəhbəri Ayxan Qədəşov bildirib ki, pilot layihənin həyata keçirilməsində başlıca məqsəd Avropa İttifaqı (Aİ) və Şərq Tərəfdaşlığı (ŞT) ölkələri arasında yaradılan vahid rəqəmsal ticarət bazarın iş prinsipinin real təcrübədə yoxlanılması olub. Yaradılan rəqəmsal bazar ən müasir standartlara cavab verməklə məlumatların yalnız bir dəfə daxil edilməsi prinsipi ilə çalışır. Sifariş daxil olduqda satıcı tərəfindən daxil olunan məlumatlar sistem tərəfindən avtomatik olaraq hər iki ölkənin (alıcı və satıcı) gömrük və poçt orqanlarına da təqdim olunur. Bu məqsədlə “İSAR Group” şirkəti tərəfindən Azərbaycanda istehsal olunan taxta əl işi məhsulunun Almaniyaya göndərilməsi pilot olaraq uğurla reallaşdırılıb. Pilot layihədən əldə olunan təcrübə digər Aİ və ŞT ölkələrində də tətbiq olunacaq.

O, həmçinin, bildirib ki, “Azexport.az” internet portalı layihədə Azərbaycanı təmsil etməklə yanaşı, Avropa İttifaqı və Şərq Tərəfdaşlığı ölkələri arasında yaradılan vahid rəqəmsal ticarət bazarı platformasının idarəetməsi də “Azexport.az” internet portalına həvalə olunub.

Qeyd edək ki, Avropa İttifaqının dəstəyilə həyata keçirilən “EU4Digital” layihəsinin başlıca məqsədi Aİ və ŞT ölkələri arasında vahid rəqəmsal ticarət bazarının yaradılması, rəqəmsal iqtisadiyyatın tətbiq sahələrinin genişləndirilməsi, rəqəmsal sahədə məşğulluq səviyyəsinin və iqtisadi artırımın dəstəklənməsi kimi istiqamətlər hədəf götürülüb.

Məqalə ilə təqdim olunan link vasitəsi ilə tanış ola bilərsiniz: https://bit.ly/3g9ggNr