Azərbaycan dünya startap reytinqində 1 pillə irəliləyib-TƏHLİL

31-05-2023 / 10:54

“Global StartupBlink” qurumu 2023-cü il üçün növbəti hesabatını açıqlayıb. Reytinqə görə, Azərbaycan 2023-cü ildə bir pillə irəliləyərək 100 ölkə arasında 84-cü yerdə qərarlaşıb.

Xeberler.az bildirir ki, bu barədə Azərbaycan İnternet Forumunun prezidenti, ekspert Osman Gündüz paylaşım edib.

Onun məlumatına görə, Bakı şəhəri isə şəhərlərarası reytinqdə 31 pillə irəliləyib:

“Ötən il isə əvvəlki illə müqayisədə Azərbaycan 4 pillə irəliləmişdi, 2021-ci ildə 19 pillə geriləmişdi. Azərbaycan bu reytinqdə hələ də 3-4 il öncəki vəziyyətini (70-ci yer) bərpa edə bilməyib. Hesabatdan görsənir ki, artıq iki ildir ki, “ASAN” “StartupBlink” qurumu ilə əməkdaşlıq edir. Adı çəkilən hesabatda da Azərbaycanda ekosistemin inkişafında “ASAN” nın xüsusi rolu qeyd edilib”.

Osman Gündüz bildirib ki, Azərbaycandan bir xeyli startaplar və ekosistem iştirakçıları bu qurumun bazasına daxil edilib:

“Amma buradan görmək olar ki, Azərbaycanın ən böyük startap xəritəsi olan “STARTUP.AZ” bazasındakı bir çox startaplar, o cümlədən startap şəhadətnaməsi alanların bir çoxu “StartupBlink” də yoxdur”.

Ekspert hesab edir ki, adı çəkilən reytinqdə qonşu ölkələrin vəziyyəti bizimlə müqayisədə daha yaxşıdır:

“Məsələn, startap ekosistemin inkişafına görə cari ildə Gürcüstan 2 pillə irəliləyərək 71-ci yeri, Ermənistan 3 pillə irəliləməklə 57-ci yeri qazanıblar. Maraqlıdır ki, müharibə şəraitində olan Ukrayna da bir pillə irəliləyə bilib və reytinqdə bizə nisbətən xeyli öndədir. Belarus 10 pillə geriləsə də bizdən öndədir”.

Osman Gündüz onu da vurğulayıb ki, Azərbaycanın reytinqdə 1 pillə irəliləməsi müsbət addım olsa da, qazandığımız mövqe regionda ən aşağı göstəricidir və potensial imkanlarımız baxımından heç bir halda yetərli hesab oluna bilməz:

“Səlahiyyətli qurumlar səylərini birləşdirərək daha ciddi proqramlara diqqət yetirməli, investisiya mühitini yaxşılaşdırmalı və startaplara dəstəyi gücləndirməlidirlər.

Ümid edirəm ölkəmizdə startap ekosistemin inkişafına cavabdeh olan RİNN, ASAN və KOBİA bu Hesabatla bağlı rəsmi açıqlamalar verəcəklər”.

Qeyd edək ki, “StartupBlink” şirkətinin “Global Startup Ecosystem” hesabatı hər il hər bir ölkə üzrə ekosistemin müxtəlif sahələrini xarakterizə edən “kəmiyyət” , “keyfiyyət” və “biznes” mühiti indeksləri əsasında formalaşır.

 


ŞƏRHLƏR






sorğu
İT mütəxəssislər iş yerlərini hansı meyarlar əsasında seçir ?
  • Şirkətin yüksək statusuna görə
  • İşin, layihənin xarakterinə görə
  • Əmək müqaviləsinin olmasına görə
  • Yüksək əmək haqqına, mükafatlara və digər güzəştlərə görə
  • Gələcək karyerası üçün əhəmiyyət kəsb etdiyinə görə
  • Maraqlı, işgüzar kollektivə görə