RƏQƏMSAL DÜNYA

Bu ilin sentyabr ayında Azərbaycan sabit genişzolaqlı internetin orta sürətinə görə 181 ölkə arasında 29,29 MB/S sürətlə 119-cu yerdə qərarlaşıb.

Speedtest Global Index” yazır ki, bu göstərici üzrə Azərbaycan avqust ayı ilə müqayisədə 1 pillə irəliləyib.

Sabit genişzolaqlı internetin sürətinə görə birinci yeri Çinin Xüsusi Administrativ Regionu (SAR) olan Hong Kong (265,17 MB/S), axırıncı yeri isə Kuba (2,13 MB/S) tutub.

Məlumata görə, Azərbaycan sentyabrda mobil internetin sürətinə görə isə 141 ölkə arasında 44,88 MB/S sürətlə 56-cı yerdə qərarlaşıb. Bu isə, avqusta nisbətən 2 pillə geriləmə deməkdir.

Mobil internetin sürətinə görə birinci yeri Birləşmiş Ərəb Əmirlikləri (BƏƏ) (211,58 MB/S), sonuncu - 141-ci yeri isə Əfqanıstan (4,89 MB/S) tutub.

Bundan başqa, sentyabrda Bakı şəhəri mobil internetin sürətinə görə 1 pillə irəliləyərək 46,73 MB/S sürətlə 169 şəhər arasında 72-ci yerə sahiblik edib.

Şəhərlər arasında mobil internetin sürətinə görə birinci yeri 255,07 MB/S sürətlə Dubay şəhəri, sonuncu yeri isə 4,73 MB/S sürətlə Əfqanıstanın paytaxtı Kabil şəhəri tutub.

Azərbaycan paytaxtı sabit genişzolaqlı internetin sürətinə görə isə 29,52 MB/S sürətlə 140-cı pillədə qərarlaşıb ki, bu da 1 pillə irəliləməkdir.

Şəhərlərin sabit genişzolaqlı internet üzrə reytinqində isə 190 şəhər rəqabət aparıb. Siyahıya BƏƏ-nin paytaxtı Əbu-Dabi şəhəri 270,24 MB/S sürətlə liderlik edib. Kubanın paytaxtı Havana şəhəri isə 2,13 MB/S sürətlə sonuncu olub.